అల్లు అర్జున్ – సుకుమార్ కాంబినేషన్లో ఓ సినిమా తెరకెక్కుతున్న సంగతి తెలిసిందే. ఈనెల 15 నుంచి నల్లమల్లలో షూటింగ్ ప్రారంభం కానుంది. అయితే ఇది వరకే.. కేరళలో కొన్ని సన్నివేశాలు తెరకెక్కించారు. అయితే అప్పుడు బన్నీ సెట్లో లేడు. బన్నీతో సంబంధం లేని కొన్ని సన్నివేశాల్ని ఈ సినిమా కోసం షూట్ చేశారు. అయితే ఇప్పుడు ఆ సన్నివేశాలన్నీ పక్కన పెట్టేశార్ట. కేరళలలో తెరకెక్కించిన సీన్లేవీ ఈ సినిమాలో ఉండవని సమాచారం. అవన్నీ ట్రైల్ షూట్ కోసం తెరకెక్కించిన సీన్లని, ఇప్పుడు అవే సన్నివేశాల్ని నల్లమల్ల అడవుల్లో చిత్రీకరిస్తారని తెలుస్తోంది. అంటే కేరళ షెడ్యూల్ మొత్తం బుట్టదఖలు అయినట్టే అన్నమాట.
కాకపోతే.. కొన్ని సినిమాలకు సంబంధించి, మరీ ముఖ్యంగా అటవీ నేపథ్యంలో సాగే కథలకు సంబంధించి… చిత్రీకరణలో కొన్ని సందేహాలుంటాయి. దట్టమైన అడవులలో, కొండల మధ్య షూటింగ్ చేస్తున్నప్పుడు ఎలాంటి వాతావరణాన్ని ఎదుర్కోవాల్సి ఉంటుంది, అక్కడ ప్రతికూల అంశాలేంటి? అనే విషయాల్ని చిత్రబృందం ముందే తెలుసుకోవాలనుకుంటుంది. అందులో భాగంగానే రెక్కీ షూట్ నిర్వహించారని సమాచారం. అందుకోసం దాదాపు ఏడు రోజులు చిత్రబృందం కష్టపడింది. ఎర్ర చందనం స్మగ్లింగ్ నేపథ్యంలో నడిచే కథ ఇది. బన్నీ ఓ లారీ డ్రైవర్ గా నటించనున్నాడు. రష్మిక కథానాయిక.
