హైదరాబాదు నగర ప్రజలు అందించిన ఈ చారిత్రాత్మక విజయంతో తమ పార్టీ వారికి, ప్రభుత్వంలోని వారికి ఎట్టి పరిస్థితుల్లోనూ అహంకారం రావడానికి వీల్లేదని, ఇంకా అణకువ రావాలని, బాధ్యత పెరిగిందని గుర్తించాలని ముఖ్యమంత్రి కేసీఆర్ అన్నారు. గ్రేటర్ విజయంపై తన స్పందనను ముఖ్యమంత్రి శుకవ్రారం రాత్రి 7.30 తరవాత ఏర్పాటుచేసిన ప్రెస్మీట్లో వెల్లడించారు. గ్రేటర్ మేనిఫెస్టోలో ఇచ్చిన అన్ని హామీలను తూచా తప్పకుండా నెరవేరుస్తాం అన్నారు. సార్వత్రిక ఎన్నికల మేనిఫెస్టోలో ఒక్కటి తప్ప.. అన్నీ పూర్తయ్యాయని.. కంపల్సరీ ఫ్రీ ఎడ్యుకేషన్ అనేది కూడా మేధావుల సలహాలతో కార్యరూపంలోకి తేబోతున్నామని చెప్పారు.
ఇది నాయకులు కష్టపడి పనిచేస్తే సాధించిన విజయం కాదు.. ప్రజలంతా ఇష్టపడి ఓట్లేస్తే దక్కిన విజయం అంటూ కేసీఆర్ అభివర్ణించారు. నగరంలోని పేదలకు దశలవారీగా ఈ ప్రభుత్వ హయాంలోనే లక్ష టూబెడ్రూం ఇళ్లు కట్టి ఇవ్వడానికి కట్టుబడి ఉన్నాం అని వెల్లడించారు. నగరం దాహార్తిని తీర్చడానికి రెండు రిజర్వాయర్లు కూడా ఏర్పాటుచేయబోతున్న సంగతిని వెల్లడించారు. హైదరాబాదులో నివసిస్తున్న వారంతా తమ బిడ్డలే అనే మాటను కేసీఆర్ పునరుద్ఘాటించారు.
నగర శాంతి భద్రతల విషయంలో ఎట్టి పరిస్థితుల్లోనూ రాజీ పడబోయేది లేదని కేసీఆర్ అన్నారు. ప్రతి ఒక్కరికీ జీవనోపాధి, రక్షణ కల్పిస్తాం అన్నారు. దంభాచారం మాట్లాడేవాళ్లకు సింగిల్ డిజిట్ సీట్లే వచ్చాయని కేసీఆర్ అన్నారు.
సీపీఐ నారాయణ నాకు మంచి మిత్రుడు అని.. ఆయన కనిపిస్తే ఎవరూ ఆయన చెవి కోయవద్దు అని కేసీఆర్ చలోక్తులు విసిరారు. ఆయనేదో సవాలు విసిరారు గానీ దాన్ని స్పోర్టివ్గా తీసుకోవాలి పట్టించుకోవద్దు అని అన్నారు. కొత్తగా ఆరు ప్రభుత్వ ఆసుపత్రులు కూడా నిర్మించబోతున్నాం అని చెప్పారు. ఆంధ్రప్రాంత వాసుల్ని కడుపులో పెట్టుకుని చూసుకుంటాం అని కేసీఆర్ హామీ ఇచ్చారు. తాగునీటి సమస్య తీరుస్తాం అన్నారు. కనురెప్పపాటు కూడా కరెంటు కోత లేకుండా చూస్తాం అని కూడా చెప్పారు. జీహెచ్ఎంసీలో లంచం ఇవ్వకుండా ప్రజలు అనుమతులు తీసుకునే రోజులు రావాలని ఆయన ఆశాభావం వ్యక్తం చేశారు. అలాంటి పరిస్థితి వచ్చినట్లయితే మాత్రమే ఇవాళ ప్రజలు మనకు అందించిన విజయానికి సార్థకత దక్కుతుందని కేసీఆర్ చెప్పారు.
