తెలంగాణ ప్రభుత్వంలో పెద్దలు ఏదైనా చిన్న పిలుపునిస్తే.. టాలీవుడ్ స్టార్స్ మొత్తం పులకించిపోతున్నారు. తామంటే తాము ముందన్నట్లుగా ప్రకటనలు వీడియోలు విడుదల చేస్తున్నారు. సాధారణంగా ఎంపీ సంతోష్ లాంటి పుట్టిన రోజులకే.. మెగాస్టార్ సైతం స్పందిస్తూ ఉంటే.. ఇక.. కేసీఆర్ పుట్టినరోజు కోసం స్పందించకపోవడం వింతే అవుతుంది. పైగా.. ఈ సారి కేసీఆర్ పుట్టిన రోజును భిన్నంగా భారీఎత్తున నిర్వహించబోతున్నారు. ఆయన పుట్టినరోజుకు గుర్తుగా కోటి మొక్కలు నాటాలని పిలుపునిస్తున్నారు. దీనికి గురించి టాలీవుడ్ పెద్దలకు తెలిసిందో.. లేదో ఇలా పిలుపునియ్యాలని అధికార పార్టీ పెద్దల నుంచి సందేశం వచ్చిందో కానీ.. వరుసగా ఒకరి తర్వాత ఒకరు వీడియోలు విడుదల చేస్తున్నారు.
చిరంజీవి, నాగార్జున ఈ లిస్టులో ముందుగా చేరారు. వీరిద్దరే.. ఇటీవలి కాలంలో కేసీఆర్ సర్కార్తో ఎక్కువ ర్యాపో మెయిన్టెయిన్ చేస్తున్నారు. దీంతో వారు కేసీఆర్పుట్టిన రోజున కోటి మొక్కల నాటడాన్ని ప్రమోట్ చేయడం తమ బాధ్యతగా భావించినట్లుగా ఉన్నారు. అందుకే.. వీడియోలు రిలీజ్ చేశారు. సినీ నటి రోజా… వైసీపీ ఎమ్మెల్యే అయినప్పటికీ… వీడియో విడుదల చేశారు. ఇక టాలీవుడ్లోని ఓ స్థాయి… ప్రముఖులంతా… వీడియోలతో ఈ రోజు హంగామాచేసే అవకాశం ఉంది. అలా వీడియోలు విడుదల చేసే వారికి .. తెలంగాణ ప్రభుత్వ పెద్దల్లో ప్రత్యేకమైన గుర్తింపు ఉంటుందనడంతో సందేహంలేదు. అలాంటి అడ్వాంటేజ్ను ఎవరు కాదనుకోగలరు.
అయితే… కోటి మొక్కలు నాటడం అనేది సాధ్యమేనా అన్నది ఇప్పుడు కీలకమైన ప్రశ్న. ఒక్క తెలంగాణలో సాధ్యం కాదు కాబట్టి… యాభై దేశాల్లో ఈ కార్యక్రమం చేపడుతున్నామని అంటున్నారు. చిరంజీవి, నాగార్జున పిలుపు మేరకు ఎంత మంది మొక్కలు నాటుతారో కానీ.. ఈ సెలబ్రిటీల పిలుపుతో.. కేసీఆర్ పుట్టిన రోజును మాత్రం.. ఘనంగా చేయాలన్న సంకేతాలు మాత్రం అభిమానులకు వెళ్లాయి. వారేం చేస్తారో చూడాలి..!
