రాజకీయ నేతలు ప్రజల్ని ఆకట్టుకోవడానికి చేసే చిత్ర విచిత్ర విన్యాసాలు ఎక్కువగా భాషా ప్రయోగాల్లోనే ఉంటాయి. వైఎస్ రాజశేఖర్ రెడ్డి రెండో సారి గెలవడానికి చేసిన కొన్ని ప్రచార ట్రిక్కుల్లో తాను 108 అంబులెన్స్లు తెచ్చానని చెప్పుకునేందుకు .. ఫోన్ చేస్తే.. కుయ్.. కుయ్ అని అంబులెన్స్ వస్తుందని.. విచిత్రంగా సౌండ్స్ చేస్తూ చెప్పేవారు. అది ఇప్పటికీ గుర్తు చేసుకుంటూనే ఉంటారు. ఇప్పుడు అలాంటి ప్రయత్నమే కేసీఆర్ చేశారు. రైతు బంధు నిధులు పది రోజుల్లో వస్తాయని చెప్పడానికి ఆయన చేసిన పద ప్రయోగం హైలెట్ అవుతోంది.
జగిత్యాల జిల్లా కలెక్టరేట్ను ప్రారంభించిన కేసీఆర్.. అక్కడ బహిరంగసభలో మాట్లాడారు. అందులో రైతు బంధు నిధులు.. మరో వారం, పది రోజుల్లో ఖాతాల్లో జమ చేస్తామని ప్రకటించారు. అయితే సాదాసీదాగా చెప్పలేదు… తనదైన శైలిలో చెప్పారు. ” రైతుబంధు వస్తది? ఇంకో ఐదు పది రోజుల్లో రైతుబంధు పడుతుంది? పడాలి కదా? ఎట్ల పడుతది.. బ్యాంకుల్లో పడంగనే టింగుటింగుమని ఫోన్కు మెస్సేజ్ వస్తది’ అని హావభావాలతో చెప్పారు. రైతు బంధు నిధులు ఇటీవలి కాలంలో ఆలస్యమవుతున్నాయి. ఎప్పుడు వస్తాయో లేదో తెలియడం లేదు. ఈ సీజన్కు నవంబర్లోనే ఇవ్వాల్సి ఉంది. కానీ డిసెంబర్ కు వచ్చినా ఇంకా అధికారిక ప్రకటన చేయలేదు. కానీ కేసీఆర్ మాత్రం ఐదు.. పది రోజులని క్లారిటీ ఇచ్చారు.
జగిత్యాల సభలో కేసీఆర్ తాను ప్రజలకు ఏం చేశానో చెప్పుకోవడానికి ప్రాధాన్యం ఇచ్చారు. అదే సమయంలో కేంద్రంపైనా విరుచుకుపడ్డారు. కానీ మోదీపై ఘాటు వ్యాఖ్యలు చేయలేదు. ఎమ్మెల్యేల కొనుగోలు కేసు ప్రస్తావించలేదు. తాను సీఎం అయినప్పుడే మోదీ ప్రధాని అయిండని.. ఈ ఎనిమిదేళ్ల కాలంలో ఎవరు ఎంత అభివృద్ధి చేశారో తేల్చుకుందామని చర్చకు రావాలని సవాల్ చేశారు.
