విపక్షాల నుంచి దూసుకు వచ్చే విమర్శలకు.. కేసీఆర్ ఇచ్చే కౌంటర్లు మైండ్ బ్లాకయ్యేలా ఉంటాయి. చైనా దుశ్చర్యలకు బలైపోయిన కల్నల్ సంతోష్ బాబుకు… కేసీఆర్ కనీసం నివాళి కూడా అర్పించలేదని రెండు రోజులుగా సోషల్ మీడియాలో విస్తృతంగా ప్రచారం జరుగుతోంది. హరికృష్ణ చనిపోతే వెళ్లారు.. పరిటాల ఫ్యామిలీ పెళ్లికి వెళ్లారు.. అంటూ.. కేసీఆర్ వెళ్లిన రకారకాల ఈవెంట్లను గుర్తు చేస్తూ …దేశం కోసం ప్రాణాలు వదిలిన సంతోష్ బాబుకు మాత్రం నివాళి అర్పించడానికి తీరిక లేదా.. అని ప్రశ్నించడం ప్రారంభించారు. ఇది అంతకంతకూ పెరిగిపోతూండటంతో.. పులిస్టాప్ పెట్టే నిర్ణయాన్ని కేసీఆర్ ప్రకటించారు.
ఇప్పుడు.. అందరూ.. కేసీఆర్ నివాళి అర్పించడానికి వెళ్లారా లేదా.. అన్నదాన్ని గురించి చర్చించరు.. కేసీఆర్ ప్రకటించిన సాయం గురించే చర్చించుకుంటారు. సంతోష్ బాబు కుటుంబానికి తెలంగాణ సర్కార్ తరపున ఏకంగా రూ. ఐదు కోట్ల సాయాన్ని కేసీఆర్ ప్రకటించారు. అలాగే.. ఆ ఘటనలో మరణించిన మరో 10 మంది సైనికులకు తలా పది లక్షల సాయం ప్రకటించారు. సంతోష్ బాబు కుటుంబానికి ఇంటి స్థలంతో పాటు.. ఆయన భార్యకు.. గ్రూప్ వన్ స్థాయి ఉద్యోగం ఇవ్వాలని కేసీఆర్ నిర్ణయం తీసుకున్నారు. ఈ మేరకు అధికారిక ప్రకటన విడుదల చేశారు. సంతోష్ కుటుంబానికి ప్రభుత్వం అండగా ఉంటుందని ప్రకటించారు.
అమరవీరుడి కుటుంబాన్ని పరామర్శించలేదని వస్తున్న విమర్శలకు కూడా.. దీంతోనే చెక్ పెట్టబోతున్నారు. ఐదు కోట్ల సాయాన్ని తానే స్వయంగా సంతోష్ బాబు ఇంటికి వెళ్లి అందిస్తానని కేసీఆర్ ప్రకటించారు. కేసీఆర్… తనపై వచ్చే విమర్శలు చాలా పీక్ స్టేజ్ కి వెళ్లిన తర్వాత ఒక్క సారిగా.. సడెన్గా అందరూ ఆశ్చర్యపోయే నిర్ణయం తీసుకుని.. అందరి నోళ్లూ ఒకే సారి మూయిస్తారు.. ఇంకా చెప్పాలంటే.. వారితోనే పొగడ్తలు అందుకుంటారు. సంతోష్ బాబు విషయంలోనూ అదే జరుగుతోంది.
