ఆంధ్రప్రదేశ్ భారతీయ జనతా పార్టీ అధ్యక్షుడు కన్నా లక్ష్మినారాయణ… విరామం లేకుండా.. ముఖ్యమంత్రి జగన్మోహన్ రెడ్డికి లేఖలు రాస్తున్నారు. గతంలో ప్రజాసమస్యలపై లేఖలు రాసిన ఆయన ఈ సారి మాత్రం.. కేసుల మీద దృష్టి పెట్టారు. శనివారం ఐటీ గ్రిడ్ కేసులో ఏం చర్యలు తీసుకున్నారని.. జగన్ ను ప్రశ్నించిన ఆయన.. ఆదివారం మరింత … ఎక్స్ట్రీమ్ లేఖ రాశారు. ఈ సారి ఆయన లేఖ రాయడానికి జగన్మోహన్ రెడ్డి బాబాయ్ వైఎస్ వివేకా హత్య కేసును ఎంచుకున్నారు. ఆ కేసును సీబీఐకి అప్పగించాలని డిమాండ్ చేస్తూ.. సీఎంకు లేఖ రాశారు. వివేకా హత్య కేసు నిందితుల్ని ఎందుకు అరెస్ట్ చేయడం లేదని లేఖలో ప్రశ్నించారు. మార్చిలో హత్య జరిగిందని.., ఇప్పటి వరకూ నిందితుల్ని అరెస్ట్ చేయలేదంటే.. ప్రభుత్వానికి చేతకావడం లేదని.. అందుకే.. కేసును సీబీఐకి అప్పగించాలని.. కన్నా లక్ష్మినారాయణ డిమాండ్ చేస్తున్నారు.
కన్నా లక్ష్మినారాయణ … చాలా కాలం నుంచి లేఖలు రాస్తున్నారు. ఆయితే.. ఆ లేఖలను సీఎంవో పట్టించుకోవడం మానేసింది. మొదట్లో…. ఏపీ బీజేపీ అధ్యక్షుడిగా తాను లేఖ రాసినా పట్టించుకోవడం లేదని.. కనీసం స్పందించడం.. మర్యాదించడం లాంటిదని.. ఆయన జగన్కు మీడియా ముఖంగానే హితవు పలికారు. అయితే.. జగన్ అలాంటివి పట్టించుకోలేదు. ఆ తర్వాత నుంచి కన్నా లక్ష్మినారాయణ బహిరంగ లేఖలు రాయడం ప్రారంభించారు. ఈ క్రమంలో.. ఇసుక కొరతపై చాలా లేఖలు రాశారు.. ఇప్పుడు.. కేసుల గురించి లేఖల సిరీస్ ప్రారంభించారు.
వైఎస్ వివేకా హత్య కేసును సీబీఐకి ఇవ్వాలన్నది… కన్నా డిమాండ్ మాత్రమే కాదు.. టీడీపీ డిమాండ్ కూడా. ఇంకా చెప్పాలంటే.. ప్రతిపక్ష నేతగా ఉన్నప్పుడు… జగన్మోహన్ రెడ్డి డిమాండ్ కూడా. ఆయన ఎప్పుడు సీఎం అయ్యారో.. అప్పుడు యూటర్న్ తీసుకున్నారు. వివేకా కేసు సీబీఐకి ఇవ్వాల్సిన అవసరం లేదని.. ఏపీ పోలీసులు సమర్థంగా విచారించగలరని చెప్పుకొస్తున్నారు. ఇదే ఏపీ పోలీసుల్ని నమ్మలేమని.. గతంలో జగన్ చెప్పారు. మొత్తానికి వివేకా కేసు.. మరో సారి హాట్ టాపిక్ అయ్యే సూచనలు కనిపిస్తున్నాయి.
