హైదరాబాద్: తెలుగువారు అదృష్టవంతులని సుప్రసిద్ధ నటుడు కమలహాసన్ అన్నారు. తెలుగు మాట్లాడేవారికి రెండు రాజధానులు ఉండటం అదృష్టమని చెప్పారు. ఇండియాలో ఒకే భాష మాట్లాడేవారికి రెండు రాజధానులు ఉండటం చాలా అరుదైన విషయమని, దక్షిణాదిన ఆ ఘనత తెలుగువారికి మాత్రమే దక్కిందని అన్నారు. ఆంధ్రప్రదేశ్ రాజధాని అమరావతి శంకుస్థాపన సందర్భంగా ఏపీ ప్రజలకు శుభాకాంక్షలు తెలిపారు. ఈ కార్యక్రమానికి ఆహ్వానం అందినా అనివార్యకారణాలవలన వెళ్ళలేకపోయానని చెప్పారు. అమరావతి నగరం సర్వాంగ సుందరంగా రూపుదిద్దుకుంటుందని తాను మనస్ఫూర్తిగా నమ్ముతున్నట్లు తెలిపారు.
మరోవైపు నడిగర్ సంఘం ప్రధాన కార్యదర్శిగా ఎన్నికైన విశాల్కు, ఆయన బృందానికి ఎలాంటి సహకారం అందించటానికైనా సిద్ధంగా ఉన్నానని కమల్ చెప్పారు. సంఘంలో తనకు ఎలాంటి గౌరవ పదవులూ అవసరంలేదని స్పష్టం చేశారు. నడిగర్ సంఘం పేరును అలాగే కొనసాగించాలని కమల్ సూచించారు.
