విజేతతో తెరంగేట్రం చేశాడు కల్యాణ్ దేవ్. ఆ సినిమా తో కల్యాణ్ ఎలాంటి ప్రభావం చూపించలేకపోయాడు. కాకపోతే.. తనలో మాస్ యాంగిల్ ఉందని నిరూపించుకున్నాడు. ఇప్పుడు `సూపర్ మచ్చీ`లో ఫుల్ మాసీ క్యారెక్టర్లో ఒదిగిపోయాడు. పులిరాజు దర్శకత్వం వహించిన చిత్రమిది. ఈ నెల 14న విడుదల అవుతోంది. ఇప్పుడు ట్రైలర్ విడుదలైంది.
హీరో పేరు రాజు. ఆ రాజు వెంటపడే అమ్మాయి మీనాక్షి. `రాజు సార్.. నన్ను ప్రేమించండి` అంటూ మీనాక్షి తిరుగుతుంటే, మీనాక్షిని ఇంకొకరు (అజయ్) ప్రేమిస్తాడు. మరి ఈ ట్రయాంగిల్ లవ్ స్టోరీ ఏమైందన్నది మిగిలిన కథ. `వాడ్ని పెళ్లి చేసుకుంటే నువ్వు సీతవవుతావో లేదో తెలీదు గానీ, వాడు మాత్రం రాముడేనమ్మా` అనే డైలాగ్ హార్ట్ టచింగ్ గా ఉంది. మీనాక్షి వెంట పడుతున్నా, రాజు కరగకపోవడానికి ఓ బలమైన కారణం ఉందన్నది అర్థమవుతోంది. ఆకారణం ఏమిటన్నదాన్ని బట్టే ఈ కథ బలాబలాలు ఆధారపడి ఉంటాయి. రిచిత రామ్ కథానాయికగా నటించింది. తనికెళ్ల భరణి, రాజేంద్ర ప్రపాద్, నరేష్, పోసాని, మహేష్.. ఇలా ప్యాడింగ్ బాగానే ఉంది. తమన్ సంగీతం అందించాడు. మరి ఈ సంక్రాంతి సినిమాల మధ్య సూపర్ మచ్చీ ఏ మేరకు నిలబడుతుందో తెలియాలంటే ఇంకొన్ని గంటలు ఆగాలి.
