రాజకీయంగా బ్యాటన్ వారసులకు ఇచ్చేసి…హాయిగా విశ్రాంతి తీసుకుందామనుకున్న జేసీ బ్రదర్స్కు.. అస్సలు కలసి రావడంలేదు. ఓటమి ఎరుగని జేసీ సోదరులు.. వారి రికార్డును కాపాడుకున్నారు కానీ వారి వారసులు మాత్రం పరాజయం పాలయ్యారు. తొలి ప్రయత్నంలో వారసుల్ని నిలబెట్టలేక మనోవేదనకు గురయ్యారు. అదే అనుకుంటే.. వైసీపీ ప్రభుత్వం వారిని వెంటాడి.. వేటాడుతోంది. రెండేళ్ల నుంచి వారు ఎదుర్కొంటున్న ఇబ్బందులు అన్నీ ఇన్నీ కావు. వారి ట్రాన్స్ పోర్ట్ వ్యాపారం దగ్గర్నుంచి మైన్స్ వరకూ మొత్తం ఎక్కడిదక్కడ ఉండిపోయింది. వారికి ఆర్థిక నష్టాలకు తోడు… ప్రభుత్వ కేసులు అదనం.
అయితే ఇప్పుడు ప్రభుత్వంపై పోరాటానికి ముందడుగు వేస్తున్నారు. మొదట్లో కొంత కాలం టీడీపీ కార్యక్రమాలకు దూరంగా ఉన్నారు కానీ.. వేధింపులు ఆగకపోవడంతో ఇప్పుడు మరింత దూకుడుగా ఉండాలని నిర్ణయించుకున్నట్లుగా తెలుస్తోంది. పెద్దారెడ్డి నేరుగా ప్రభాకర్ రెడ్డి ఇంటికే వచ్చి సవాల్ చేయడంతో.. ఇక వెనక్కి తగ్గితే.. వర్గాన్ని కాపాడుకోవడం కష్టం అవుతుందన్న అంచనాకు వచ్చారు. అందుకే … జేసీ దివాకర్ రెడ్డి కూడా తెర ముందుకు వచ్చారు. తన వర్గీయులపై అట్రాసిటీ కేసులు అక్రమంగా బనాయిస్తున్నారని చెబుతూ.. ఆమరణదీక్షలకు ప్లాన్ చేశారు. దాన్నిసోమవారమే చేస్తున్నారు. దీక్షల కారణంగా.. తాడిపత్రిలో ఉద్రిక్త పరిస్థితి ఏర్పడింది. పోలీసులు పోలీస్ యాక్ట్ అమలు చేస్తున్నారు.
టీడీపీ ఓడిపోయిన వెంటనే ఆయనకు బీజేపీ నుంచి ఆఫర్ వచ్చింది. వైసీపీ వేధింపుల నుంచి రక్షణ పొందాలంటే.. బీజేపీలో చేరాలని ఆఫర్ ఇచ్చారు. కానీ జేసీ బ్రదర్స్ తోసి పుచ్చారు. అదే పనిగా పార్టీలు మారడం ఇష్టం లేదని వారు టీడీపీలోనే ఉండిపోయారు. వైసీపీ నుంచి కూడా వారికి ఆఫర్స్ వచ్చినట్లుగా ప్రచారం జరిగింది. కానీ.. ఎందుకోకానీ వారు.. పార్టీ మారేందుకు ఆసక్తి చూపించలేదు. కావాలంటే… రాజకీయాలకు కొంత కాలం దూరంగా ఉండి.. సైలెంట్ గా ఉంటామన్నట్లుగా మాట్లాడారు కానీ… పార్టీ మారలేదు. రెండు రోజుల కిందట.. కూడా జేసీ పవన్ రెడ్డి అదే మాట చెబుతున్నారు. వైసీపీ సర్కార్తో తాడోపేడో తేల్చుకుంటాం కానీ వెనక్కి తగ్గేదిలేదంటున్నారు. మొత్తానికి జేసీ బ్రదర్స్ రాజకీయం పోరాటంతో టీడీపీలోనూ.. కాస్తంత ఉత్సాహం వచ్చే సూచనలు కనిపిస్తున్నాయి.
