ఏపీ ప్రభుత్వ నగదు బదిలీ పథకాల్లో భాగంగా అక్టోబర్ క్యాలెండ్‌లో ఉన్న పథకాలకు నేడు సీఎం జగన్ మీట నొక్కి డబ్బులు విడుదల చేయనున్నారు. రైతుభరోసా పథకం కింద యాభై లక్షలకుపైబడిన రైతులకు ఒక్కొక్కరి ఖాతాల్లో రూ. నాలుగు వేలు జమ చేయనున్నారు. ఇందు కోసం రూ.2,052 కోట్లు కేటాయించారు. నిజానికి ఈ నాలుగు వేలల్లో రెండు వేలు కేంద్రమే ఆగస్టులో ఇచ్చేసింది. ఇప్పుడు ఏపీ ప్రభుత్వం తరపున రెండు వేలు మాత్రమే అకౌంట్‌లో జమ అవుతాయి. కేంద్ర జాబితాలో ఏపీ నుంచి 30 లక్షల మంది రైతులు కూడా లేరు. మిగిలిన వారికి ఏపీ ప్రభుత్వం మొత్తం ఇస్తుందో లేదో క్లారిటీలేదు. అందుకే పీఎం కిసాన్ అనేరు రైతు భరోసాకు జోడించారు.

ఇక రైతులు బ్యాంకుల నుంచి రుణాలు తీసుకుని తిరిగి చెల్లించేసిన వారికి సున్నా వడ్డీ పథకం అమల్లో ఉంది. రూ.లక్షలోపు పంట రుణాలను సకాలంలో తిరిగి చెల్లించిన వారికి సున్నావడ్డీ కింద రాయితీ ఇస్తున్నారు. 2020 సీజన్‌కు సంబంధించి 6.67 లక్షల మంది రైతులు ఇలా రుణాలు తీసుకుని చెల్లించినట్లుగా తేల్చి వారికి రూ.112.70 కోట్ల సున్నావడ్డీ రాయితీ సొమ్మును వారి ఖాతాల్లో జమచేస్తున్నారు. నిజానికి మేనిఫెస్టోలో రైతులు ఎంత మొత్తం తీసుకున్నా సున్నా వడ్డీ అమలు చేస్తామని మొదటి అసెంబ్లీ భేటీలో జగన్ చెప్పారు. తీరా చూస్తే అది ఏడాదికి వంద కోట్ల వద్దనే ఉంటోంది. గత ప్రభుత్వం రూ. రెండు లక్షల వరకూ సున్నా వడ్డీ పథకం అమలు చేస్తే జగన్ సర్కార్ రూ. లక్షకే పరిమితం చేసి అమలు చేస్తోంది.

మరో వైపు చిన్న, సన్నకారు రైతులకు ఆధునిక వ్యవసాయ యంత్ర పరికరాలపై సబ్సిడీని పాతిక కోట్లను నేడు సీఎం విడుదల చేనయున్నారు గ్రామస్థాయిలో 789 యంత్ర సేవా కేంద్రాలను ప్రారంభించారు. యంత్ర సేవాపథకం కింద గ్రామస్థాయిలో రూ.25 లక్షల విలువైన వరికోత యంత్రాలను సబ్సిడీపై ఇస్తున్నారు. రైతులు కమిటీలుగా ఏర్పడి సబ్సిడీ పొందుతున్నారు. ఈ సబ్సిడీ పాతిక కోట్లను రైతు గ్రూపులకు సీఎం జమ చేస్తారు.