ఆంధ్రప్రదేశ్ రాజధానిగా అమరావతిని కొనసాగించే ఉద్దేశం.. ఆంధ్రప్రదేశ్లోని వైఎస్ఆర్ కాంగ్రెస్ పార్టీ సర్కార్ కు లేదని… ఢిల్లీలోని కేంద్ర బీజేపీ కార్యాలయంలో.. అధికార ప్రతినిధి హోదాలో మీడియా సమావేశం పెట్టి మరీ.. జీవీఎల్ నరసింహారావు ప్రకటించారు. పలుమార్లు ఈ విషయాన్ని ఆయన నొక్కి చెప్పారు. ఈ సమాచారం తనకు ఎలా తెలిసిందో మాత్రం బయట పెట్టలేను కానీ.. బీజేపీ అధికార ప్రతినిధిగా.. తనకు స్పష్టమైన సమాచారం ఉందని.. ఆయన తేల్చి చెప్పేశారు.
ఆ నివేదికలో రాజధాని మార్పు గురించి జగన్ చెప్పారా..?
కొద్ది రోజుల కిందట.. వైఎస్ జగన్మోహన్ రెడ్డి ప్రధానమంత్రి నరేంద్రమోడీతో భేటీ అయ్యారు. ఆ సమయంలో..రాజధానిపై… ఓ ప్రత్యేకమైన నివేదికను..మోడీకి సమర్పించినట్లుగా ప్రచారం జరిగింది. ఈ విషయంలో… అటు రాష్ట్రం కానీ.. ఇటు కేంద్రం కానీ.. ఎలాంటి అధికారిక ప్రకటన చేయలేదు. మాజీ మంత్రి యనమల లాంటి వాళ్లు.. డాక్యుమెంట్ పబ్లిక్ ప్రాపర్టీ అని.. బయట పెట్టాలని డిమాండ్ చేశారు. ఆ నివేదికలో…ఏపీ రాజధాని అమరావతి 80 శాతం ఒకే సామాజికవర్గం చేతిలో ఉందని.. అక్కడ కొనసాగించడం మంచిది కాదని … మారుస్తామన్న అభిప్రాయాన్ని వ్యక్తం చేసినట్లుగా ఢిల్లీలో జోరుగా ప్రచారం జరుగుతోంది. బీజేపీ అధికార ప్రతినిధిగా.. జీవీఎల్కు.. జగన్మోహన్ రెడ్డి .. ప్రధాని మోదీకి ఇచ్చిన నివేదికకు సంబంధించిన స్పష్టమైన సమాచారం అందిందని… అందుకే .. మీడియా సమావేశం పెట్టి మరీ ఈ విషయాన్ని ప్రకటించారని అంటున్నారు…
రాజధాని మార్పునకు బీజేపీ సానుకూలమే..!?
ఒక సామాజికవర్గం లాభపడుతుందన్న కారణం చెప్పి.. రాజధాని మార్చలేరు కాబట్టి ముంపు లేకపోయినా.. ముంపు ప్రచారాన్ని తెరపైకి తెచ్చారని చెబుతున్నారు. అదే విధంగా ఖర్చు కూడా ఎక్కువ అవుతుందంటున్నారు. ఈ రెండు కారణాలకు జీవీఎల్ తన మద్దతు తెలిపారు. రాజధాని తరలింపు నిర్ణయానికి పరోక్షంగా.. తమ మద్దతు ఉంటుందని కూడా తెలిపారు. గత ప్రభుత్వ హయాంలో.. అమరావతిలో ఏ నిర్మాణమూ జరగలేదని… జీవీఎల్ చెప్పుకొచ్చారు. కేంద్రం ఇచ్చిన పదిహేను వందల కోట్లతో… తాత్కాలిక నిర్మాణాలే ఉన్నాయన్నారు. నిజానికి ఏపీ రాజధానిలో… సెక్రటేరియట్, హైకోర్టు పని చేయడం ప్రారంభించాయి. ప్రజాప్రతినిధులు, ఉద్యోగుల ఇళ్లు నిర్మాణ అయ్యాయి. ఓ రకంగా.. అక్కడ 30వేల కోట్లకుపైగా వ్యయంతో మౌలిక సదుపాయాల కల్పన జరిగింది. ఇవన్నీ… జీవీఎల్ నరసింహారావుకు తెలియనివి కావు. అయినప్పటికీ.. అక్కడ ఏమీ లేనందునే.. ఇప్పుడు తరలింపు అంశం చర్చకు వస్తోందని అంటున్నారు. చంద్రబాబు నాలుగేళ్లలో అన్నీ కట్టేసి ఉంటే.. ఈ సమస్య ఉండేది కాదన్నారు.
కేంద్రానికి సంబంధం లేదనే వాదన వినిపిస్తున్న జీవీఎల్…!
ఏపీలో తిరిగే భారతీయ జనతా పార్టీ నేతలు ఏం చెప్పినప్పటికీ… జీవీఎల్ నరసింహారావు చెప్పిందే.. భారతీయ జనతా పార్టీ విధానం. ఆ పార్టీ చెబుతున్న దాని ప్రకారం..రాజధాని తరలింపు ఖాయం. ఆ విషయాన్ని త్వరగా తేల్చాలని.. నాన్చవద్దని కూడా జీవీఎల్ .. చెప్పుకొచ్చారు. అదే సమయంలో.. కేంద్రానికి ఏ సంబంధమూ లేదని.. కూడా జీవీఎల్ తేల్చేశారు. ప్రధానికి నివేదిక ఇవ్వడమూ..కేంద్రానికి చెప్పే అన్నీ చేస్తున్నామన్నట్లుగా.. విజయసాయిరెడ్డి ప్రకటించడం వంటి కారణాలతో … రాజధాని మార్పుతో ఏమైనా తేడా వస్తే.. తమపై విమర్శలు రాకుండా… బీజేపీ ముందుగానే జాగ్రత్త పడుతోందని… అనుకోవచ్చు..
