విజయ్ దేవరకొండ దృష్టంతా ఇప్పుడు ‘లైగర్’ ప్రమోషన్ల మీదే ఉంది. ఈ సినిమా అవ్వగానే ‘ఖుషి’ సెట్స్లో పాల్గొనాలి. మరోవైపు ‘జనగణమన’ కూడా ఉంది. అయితే.. `లైగర్` తరవాత విజయ్ కనీసం నాలుగు వారాల బ్రేక్ తీసుకోబోతున్నాడని టాక్. విజయ్ ప్రస్తుతం విపరీతమైన నడుం నొప్పితో బాధ పడుతున్నాడు. ఆ నొప్పిని పంటికింద బిగబెట్టుకొని మరీ ‘లైగర్’ ప్రమోషన్లలో ఊపిరి సలపనంత బిజీగా ఉన్నాడు. లైగర్ 25న వచ్చేస్తోంది. తన ప్రమోషన్ల పని అయిపోగానే.. మీడియాకు, సినిమాకూ, షూటింగులకూ కనీసం నెల రోజులు దూరంగా ఉంబోతున్నాడట. ఆ తరవాత మరోసారి వైద్య పరీక్షలు చేయించుకొని అప్పుడు `ఖుషి` సెట్స్కి ఎప్పుడు వెళ్లాలి? అనే నిర్ణయం తీసుకుంటాడని టాక్.
`లైగర్` మార్షల్ ఆర్ట్స్ నేపథ్యంలో సాగిన సినిమా. ఈ సినిమాలోని బాక్సర్ పాత్ర కోసం.. విజయ్ బాగా కష్టపడ్డాడు, ప్రొఫెషషనల్ బాక్సర్ల దగ్గర ట్రైనింగ్ తీసుకొన్నాడు. ఈక్రమంలో.. నడుం నొప్పి మొదలైంది. ఇప్పుడు అది భరించలేనంతగా మారిందని తెలుస్తోంది. అందుకే `లైగర్` తరవాత బ్రేక్ తీసుకోవడం అత్యవసరమైంది. విజయ్ బ్రేక్ వల్ల `ఖుషి` షూటింగ్ లేటవుతుంది. ఈ డిసెంబరులోనే `ఖుషి`ని రిలీజ్ చేయాలనుకొన్నారు. నెల రోజులు షూటింగ్ కి గ్యాప్ వస్తే… ‘ఖుషి’ ఆలస్యమయ్యే అవకాశాలున్నాయి.
