‘గుంటూరు కారం’ తరవాత మహేష్బాబు సినిమాలకు సంబంధించిన విషయాలేం బయటకు రాలేదు. రాజమౌళి సినిమా ఒకటి ప్రీ ప్రొడక్షన్ దశలో ఉంది. ఆయనతో సినిమా అంటే… ఫ్యాన్స్ ఏళ్లకు ఏళ్లు ఎదురుచూపుల్లోనే మగ్గాలి. సినిమా ఎప్పుడు ప్రారంభిస్తారు? ఎప్పుడు ఆ సినిమా ప్రేక్షకుల ముందుకు వస్తుంది? అనే విషయాల్లో రాజమౌళి నుంచి ఎలాంటి అప్ డేటూ లేదు. ఈ సినిమా టైటిల్ విషయంలోనూ బోలెడన్ని రూమర్లు చక్కర్లు కొడుతున్నాయి. మహేష్ బాబు తప్ప మరో స్టార్ కాస్టింగ్ ని చిత్రబృందం అధికారికంగా ప్రకటించలేదు. ఈ సినిమాకు సంబంధించిన ఒక్కటి.. ఒక్కటంటే ఒక్క అప్ డేట్ కూడా రాలేదు. ఈ విషయాల్లో మహేష్ ఫ్యాన్స్ లో అసంతృప్తి రోజు రోజుకీ పెరిగిపోతోంది.
అయితే ఈ నిరీక్షణకు ఆగస్టు 9తో తెరపడడం ఖాయంగా కనిపిస్తోంది. ఆరోజు మహేష్ పుట్టిన రోజు. ఈ సందర్భంగా మహేష్ – రాజమౌళి సినిమాకు సంబంధించిన ఓ ఇంట్రస్టింగ్ అప్ డేట్ రావడం పక్కా అని తెలుస్తోంది. ఈ సినిమాకు సంబంధించి రాజమౌళి ఓ కాన్సెప్ట్ వీడియో విడుదల చేసే ప్రయత్నాల్లో బిజీగా ఉన్నారని తెలుస్తోంది. ఆ కాన్సెప్ట్ వీడియోని విడుదల చేసి, ఈ ప్రాజెక్టుని అధికారికంగా ప్రకటించాలని రాజమౌళి భావిస్తున్నారు. దానికి ఆగస్టు 9 ముహూర్తంగా నిర్ణయించినట్టు సమాచారం అందుతోంది. సాధారణంగా రాజమౌళి కొత్త సినిమా ప్రారంభించేటప్పుడు ఓ ప్రెస్ మీట్ పెట్టి, సినిమాకు సంబంధించిన కీలకమైన వివరాలు మీడియాతో పంచుకోవడం అలవాటు. ఆగస్టు 9కి ముందే.. ఆ మీడియా సమావేశం ఏర్పాటు చేస్తారని, అయితే కాన్సెప్ట్ వీడియో మాత్రం ఆగస్టు 9న వదులుతారని తెలుస్తోంది. మొత్తానికి మహేష్ పుట్టిన రోజుకు మంచి సర్ప్రైజే ప్లాన్ చేశాడు జక్కన్న.
