పాత రోజుల్లో పులులతోనూ, సింహాలతోనూ హీరోలు ఫైటింగులు చేస్తుంటే, గుడ్లప్పగించి చూసేవారు ప్రేక్షకులు. కాలం మారింది. ఫైట్స్ కొత్త పుంతలు తొక్కుతున్నాయి. అయినా సరే, ఇప్పటికీ మృగాలతో హీరో తలపడే సీన్లకు విజిల్స్ పడుతున్నాయి. సాంకేతికత మరింత వాడుకొని, ఆయా సన్నివేశాల్ని సహజంగా తెరకెక్కిస్తే చాలు. ఫైటు హిట్టు. ‘ఆర్.ఆర్.ఆర్`లో ఎన్టీఆర్ పులిని వేటాడే సీన్ ఇలాంటిదే.
ఇప్పుడు ‘కంగువ’లో సూర్య మొసలితో ఫైట్ చేయబోతున్నాడు. సూర్య నటిస్తున్న భారీ ఎడ్వెంచరస్ చిత్రమిది. సాంకేతికంగా ఉన్నంతంగా తీర్చిదిద్దుతున్నారు. ఈ సినిమాలో సూర్యని పనిచయం చేసే సన్నివేశం కోసం మొసలితో ఫైట్ డిజైన్ చేశారు. అది చాలా బాగా వచ్చిందని టాక్. సూర్య అభిమానులు ఆ ఫైట్ ని బాగా ఎంజాయ్ చేస్తారని, ఈ సినిమాలోని ప్రధానమైన ప్రత్యేకతల్లో ఈ ఫైట్ ఒకటని తెలుస్తోంది. బాబీడియోల్ ఈ చిత్రంలో ప్రతినాయకుడిగా కనిపించబోతున్నాడు. బాలీవుడ్ హీరో కార్తీక్ ఆర్యన్ అతిథి పాత్రలో మెరవబోతున్నాడు. షూటింగ్ దాదాపుగా పూర్తయ్యింది. అయితే విజువల్ ఎఫెక్ట్స్ కోసం చిత్ర బృందం మరింత సమయం తీసుకోవాలనుకొంటోంది. ఆగస్టులో ఈ చిత్రాన్ని ప్రేక్షకుల ముందుకు తీసుకొస్తారు.
