ఆంధ్రప్రదేశ్లో ఇప్పుడు అంతా రివర్స్ పాలన సాగుతోంది. రివర్స్ టెండర్లు మాత్రమే కాదు.. పరిశ్రమలు కూడా రివర్స్ అవుతున్నాయి. ఐదు నెలల కిందటి వరకూ.. వచ్చిపోయే పారిశ్రామికవేత్తలతో ఏపీ కళకళలాడేది. ప్రతీ నెలా ఏదో ఓ శంకుస్థాపన జరిగేది. కానీ ఇప్పుడు శంకుస్థాపన చేసుకున్నవి కూడా రివర్స్ అవుతున్నాయి.
ఐదు నెలల నుంచి ఏపీలో పెట్టుబడులన్నీ రివర్స్..!
ఆదాని గ్రూప్ విశాఖలో రూ. 70వేల కోట్ల పెట్టుబడితో విశాఖలో డేటా సెంటర్ పెట్టాలనుకుంది. కానీ.. దాని గురించి చెప్పకుండా సైలెంట్ గా హైదరాబాద్ కు వెళ్లిపోయింది. చంద్రబాబు సీఎంగా ఉన్నప్పుడు ప్రకాశం జిల్లాలో ఏషియన్ పల్ప్ అండ్ పేపర్ అనే కంపెనీ పెట్టుబడులు పెట్టేందుకు ముందుకు వచ్చిది. ఆయితే.. కొద్ది రోజుల క్రితం.. ఆ ఎంవోయూ విషయంలో.. ఆసక్తిగా లేదని..పేపర్ పరిశ్రమలో ప్రచారం జరిగింది. ఏపీపీ కూడా.. మళ్లీ ఏపీ వైపు చూడలేదు. దీంతో ఆ పరిశ్రమ కూడా వెనక్కి పోయినట్లేనన్న అభిప్రాయం… ఏర్పడింది. కొన్ని పరిశ్రమలు వెనక్కి వెళ్లిపోతే.. మరికొన్నింటినీ ఏపీ ప్రభుత్వం పంపేసింది. విశాఖలో అంతర్జాతీయ స్థాయి మాల్ నిర్మాణానికి ముందుకు వచ్చిన లులూ గ్రూప్కు కేటాయిచిన భూమిని ప్రభుత్వం రద్దు చేసింది. అలాగే అమరావతిలో భారీ వైద్య సంస్థలను నిర్మించాలనుకు ప్రసిద్ధ కంపెనీల భూముల కేటాయింపులను రద్దు చేశారు. విజయవాడ సమీపంలో నిర్మితమైన అశోక్ లేలాండ్ కంపెనీ.. ఎలక్ట్రిక్ బస్సుల కంపెనీ శరవేగంగా ఫ్యాక్టరీని నిర్మించింది. కానీ ఉత్పత్తి మాత్రం ప్రారంభించలేదు.
ప్రభుత్వ విధానాలతో మరింత దూరం..!
ఇక ఏపీలో పరిశ్రమలు పెట్టేందుకు గతంలోఎంవోయూ కుదుర్చుకున్న సంస్థలు.. ముందూ వెనుకాడుతున్నాయి. గత ప్రభుత్వంతో ఒప్పందాలు చేసుకున్నందున ఆయా సంస్థలతో డీల్ చేసేందుకు ఏపీ సర్కార్ సిద్ధపడటం లేదన్న ప్రచారం జరుగుతోంది. దీంతో.. గత ఐదు నెలల కాలంలో.. ఏపీకి ఒక్కటంటే.. ఒక్క పరిశ్రమ రాలేదు. కానీ.. వేల కోట్ల పెట్టుబడుల ప్రతిపాదనలున్న కంపెనీలు మాత్రం రివర్స్ అయ్యాయి.. వైసీపీ సర్కార్ అధికారంలోకి వచ్చిన వెంటనే.. ఏపీలో ఎవరు ఏ పరిశ్రమ పెట్టినా.. 75 శాతం ఉద్యోగాలు స్థానికులకే ఇవ్వాలని చట్టం తెచ్చారు. అలాగే.. గతంలో భూములు పొందిన పారిశ్రామికవేత్తలకు వరుసగా నోటీసులు వెళ్లాయి. కొన్ని కంపెనీలపై కక్షగట్టినట్లుగా వ్యవహరించడం… విద్యుత్ కొనుగోలు ఒప్పందాల విషయంలో… ఒప్పందాలను కూడా పట్టించుకోబోమన్నట్లుగా ఉండటంతో.. ఏపీపై పెట్టుబడిదారులు విశ్వాసం కోల్పోయారన్నట్లుగా పరిశ్రమ వర్గాలు అంచనా వేస్తున్నాయి.
ప్రభుత్వ కార్యాచరణ ఇలాగేనా..?
ఏపీకి పరిశ్రమలు అవసరం లేదన్నట్లుగా ప్రభుత్వం తీరు ఉంది. ప్రోత్సహాకాలు ఇవ్వడం దండగని… సాక్షాత్తూ మంత్రే ప్రకటించేస్తున్నారు. ఆయన ఏపీని ఇట్టే పారిశ్రామికీకరణ చేస్తామని చెబుతున్నారు. ఐదు నెలల్లో.. రెండు విదేశీ బృందాలు.. పెట్టుబడులు పెడతామమంటూ ముందుకు వచ్చాయి.అందులో ఒకటి.. ఫ్రాన్స్ కు చెందిన వికాట్ గ్రూప్. అది సీఎం జగన్మోహన్ రెడ్డికి చెందిన భారతీ సిమెంట్స్ భాగస్వామి. మరింత విస్తరిస్తామంటూ.. జగన్ ను కలిసి చెప్పుకున్నారట. మరొకరరు.. శ్రీకాకళహస్తిలో పాదరక్షల సెజ్ కోసం వచ్చారని చెబుతున్నారు. ఆ హాంకాంగ్ కంపెనీ పైనే చాలా అనుమానాలొచ్చాయి. ఈ తీరుతో.. ఏపీ పారిశ్రామికీకరణ పడకేసినట్లే. వ్యవసాయఆధారిత రాష్ట్రంగా ఏపీ మిగిలిపోవాల్సిందే.
