రాజ‌మౌళి క‌ల‌ల‌న్నీ భారీగా ఉంటాయి. ఆయ‌న సినిమా అంటేనే విజువ‌ల్ ట్రీట్. క‌థ‌తోనే కాదు, కాంబినేష‌న్‌ల‌తోనూ పిచ్చెక్కించేస్తారాయ‌న‌. ఇప్పుడు అలాంటి అరుదైన కాంబినేష‌న్ తెర‌పై చూపించ‌డానికి స‌న్నాహాలు చేస్తున్న‌ట్టు ఇన్ సైడ్ వ‌ర్గాల టాక్‌.

మ‌హేష్ – రాజ‌మౌళి కాంబినేష‌న్లో రూపొందుతున్న సినిమాలో హృతిక్ రోష‌న్ కూడా భాగం పంచుకోబోతున్న‌ట్టు విశ్వ‌స‌నీయ వ‌ర్గాల స‌మాచారం. ఈ సినిమా కోసం ఓ బ‌ల‌మైన ప్ర‌తినాయ‌కుడి పాత్ర సృష్టించారు రాజ‌మౌళి. అందులో ఎవ‌రైతే బాగుంటార‌న్న విష‌యంపై చాలా రోజుల నుంచి త‌ర్జ‌న భ‌ర్జ‌న‌లు జ‌రుగుతున్నాయి. ఇప్పుడు ఈ ఆలోచ‌న‌ల‌న్నీ హృతిక్ రోష‌న్ వ‌ర‌కూ వ‌చ్చి ఆగాయ‌ని టాక్‌. అన్నీ కుదిరితే మ‌హేష్ సినిమాలో హృతిక్ ప్ర‌తినాయ‌కుడిగా క‌నిపించే అవ‌కాశాలు పుష్క‌లంగా ఉన్నాయి. ప్ర‌స్తుతం ఈ సినిమా కోసం హైద‌రాబాద్ లోని అల్యూమినియం ఫ్యాక్ట‌రీలో ఓ పెద్ద సెట్ వేస్తున్నారు. మే నాటికి ఈ సెట్ ప‌నులు పూర్త‌వుతాయి. ఆ త‌ర‌వాతే… షూటింగ్ ప్రారంభించే అవ‌కాశం ఉంది. ఈలోగా హృతిక్ రోష‌న్ ఎంట్రీపై ఓ స్ప‌ష్ట‌త వ‌స్తుంది.