ఆదిత్య 369కి సీక్వెల్‌గా ఆదిత్య 999 వ‌స్తుంద‌ని చాలా కాలం నుంచి నంద‌మూరి అభిమానులు ఆశ‌గా ఎదురు చూస్తున్నారు. బాల‌య్య వందో సినిమాగా ఆదిత్య 999 తెర‌కెక్కాల్సిందే. సింగీతం శ్రీ‌నివాస‌రావు స్క్రిప్టుని సిద్ధం చేశారు కూడా. కానీ… గౌత‌మిపుత్ర శాత‌క‌ర్ణి క‌థ త‌న‌ని వెదుక్కుంటూ రావ‌డంతో ఆ సీక్వెల్‌ని ప‌క్క‌న పెట్టేశారు.

అయితే ఇప్పుడు ఈ సీక్వెల్‌పై మ‌ళ్లీ ఆశ‌లు చిగురిస్తున్నాయి. ఎట్టిప‌రిస్థితుల్లోనూ ఆదిత్య 999 చేయాల‌ని బాల‌య్య డిసైడ్ అయ్యార్ట‌. అందుకే ఈ స్క్రిప్టుని మ‌ళ్లీ బ‌య‌ట‌కు తీశార‌ని స‌మాచారం. అయితే ఈ క‌థ‌ని సింగీతంతో కాకుండా మ‌రో ద‌ర్శ‌కుడితో చేయాల‌న్న‌ది బాల‌య్య ఆలోచ‌న‌. ఇటీవ‌ల ఓ యువ ద‌ర్శ‌కుడికి ఈ స్క్రిప్టు చ‌దివి అభిప్రాయం చెప్ప‌మ‌ని బాల‌య్య అడిగిన‌ట్టు టాక్‌. అన్నీ కుదిరితే… స‌ద‌రు ద‌ర్శ‌కుడితోనే ఈ సీక్వెల్ ప‌ట్టాలెక్కే అవ‌కాశం ఉంది. ఈమ‌ధ్య బాల‌కృష్ణ‌తో ఓ సినిమా చేయ‌బోతున్నాన‌ని ప్ర‌ముఖ నిర్మాత అంబికా కృష్ణ ప్ర‌క‌టించారు. బ‌హుశా… ఆ ప్రాజెక్టు ఇదే అయ్యుంటుంది.