ఆంధ్రప్రదేశ్ ప్రభుత్వం ఫోన్ ట్యాపింగ్ కు పాల్పడుతోందని .. స్వతంత్ర దర్యాప్తు సంస్థతో విచారణ చేయించాలని దాఖలైన పిటిషన్పై హైకోర్టు ఆధారాలు ఉంటే సమర్పించాలని ఆదేశించింది. ఈ పిటిషన్ దాఖలు చేసిన శ్రావణ్ కుమార్.. ఏపీ సర్కార్ .. ట్యాపింగ్ కోసం ప్రత్యేకంగా అధికారిని నియమించిందని పిటిషన్లో పేర్కొన్నారు. ఆ అధికారి పేరు చెప్పాలని ధర్మాసనం శ్రావణ్ కుమార్ను కోరింది. అయితే.. ప్రత్యేకంగా అఫిడవిట్ దాఖలు చేస్తానని శ్రావణ్ కుమార్ చెప్పారు. రాజకీయ నాయకుల మాదిరిగా న్యాయమూర్తులకు కూడా షాడో పార్టీలను నియమించారని శ్రవణ్ కోర్టుకు తెలిపారు. దీంతో.. కేంద్ర, రాష్ట్ర ప్రభుత్వాలతో పాటు.. టెలికాం సర్వీస్ ప్రొవైడర్లకు హైకోర్టు నోటీసులు జారీ చేసింది. ఈ నెల ఇరవయ్యో తేదీకి విచారణకు వాయిదా వేసింది.
వాదనలు జరుగుతున్న సమయంలో.. ప్రభుత్వ తరపు న్యాయవాది విచారణ అవసరం లేదన్నట్లుగా వాదిస్తూండటంతో.. విచారణ జరిపితే.. మీకు ఇబ్బందేమిటని ధర్మాసనం ప్రశ్నించింది. ఈ పిటిషన్లో న్యాయదేవతపై నిఘాపేరుతో కథనం రాసిన ఆంధ్రజ్యోతిని కూడా పార్టీని చేయాలని ప్రభుత్వం తరపు న్యాయవాది కోరారు. ఆ కథనాన్ని చదివి వినిపించాలని హైకోర్టు కోరింది.
కథనంలో ఏముందో అడిగి తెలుసుకుంది. ఎవరి ఫోన్ ట్యాపింగ్ చేసినా అది చిన్న విషయం కాదని.. దర్యాప్తుకు ఆదేశిస్తే అసలు విషయాలు బయటపడతాయి కదా అని హైకోర్టు వ్యాఖ్యానించింది. దీనిపై ఏమైనా అభ్యంతరం ఉందా అని ప్రభుత్వం తరపున న్యాయవాదిని హైకోర్టు ప్రశ్నించింది.
ప్రభుత్వం తరపున అఫిడవిట్ దాఖలు చేయాలని ఆదేశించిన ధర్మాసనం.. తదుపరి విచారణను గురువారానికి వాయిదా వేసింది. ట్యాపింగ్పై విచారణ చేయించాలా లేదా.. అ్నది .. ఆ రోజే నిర్ణయం తీసుకుంటామని తెలిపింది. నేరుగా న్యాయమూర్తుల ఫోన్లే ట్యాప్ చేశారని న్యాయవాది పిటిషన్ వేశారు . ఆ అంశంలో ఎలాంటి నిజం లేదని భావిస్తే హైకోర్టు ధర్మాసనం.. అభ్యంతరం చెప్పేదేనని న్యాయనిపుణులు చెబుతున్నారు. గురువారం..హైకోర్టు నిర్ణయం కీలకం కానుంది.
