లోక్ సభ ఎన్నికల సమయం సమీపిస్తోన్న వేళ సినీ స్టార్లు కూడా ప్రచార పర్వంలోకి దూకుతున్నారు. తమ బంధువులను ఎన్నికల్లో గెట్టేక్కించేందుకు తమ వంతు పాత్ర పోషించాలని డిసైడ్ అయ్యారు. తాజాగా టాలీవుడ్ హీరో వెంకటేష్ ప్రచారం చేసేందుకు సూత్రప్రాయంగా అంగీకరించినట్లుగా తెలుస్తోంది.
అనేక పరిణామాల నడుమ ఖమ్మం కాంగ్రెస్ టికెట్ దక్కించుకున్నారు రామాసహాయం రఘురాంరెడ్డి. ఆయన తరఫున వెంకటేష్ ప్రచారం చేయనున్నట్లు సమాచారం. రామసహాయం రఘురాం రెడ్డి – వెంకటేష్ వియ్యంకులు. రఘురాం పెద్ద కొడుకుకు వెంకటేష్ పెద్ద కుమార్తె ఆశ్రితతో వివాహం జరిగింది. దీంతో వియ్యంకుడి గెలుపు కోసం వెంకటేష్ రంగంలోకి దిగనున్నట్లు తెలుస్తోంది.
ఖమ్మం పట్టణంలో ఈ నెల 7వ తేదీ నుంచి రామసహాయం రఘురాం రెడ్డి తరఫున రోడ్ షోలో పాల్గొననున్నట్లు తెలుస్తోంది. అనంతరం వెంకటేష్ మరో చోట కూడా ప్రచారం చేయనున్నారు. కామినేని శ్రీనివాస రావు కూడా వెంకటేష్ కు బంధువు కావడంతో ఆయన తరఫున క్యాంపెయిన్ చేసే అవకాశం ఉందని టాక్ నడుస్తోంది.
ఇప్పటికే పవన్ కళ్యాణ్ తరఫున సినీ ప్రముఖులు ప్రచారం చేస్తున్నారు. ఇటీవల బాబాయ్ కోసం వరుణ్ తేజ్ కూడా పిఠాపురంలో ప్రచారం నిర్వహించారు. హీరో నిఖిల్ బాపట్లలో టీడీపీ అభ్యర్థి మద్దలూరి మాలకొండయ్యను గెలిపించాలంటూ ఓ దఫా ప్రచారం నిర్వహించారు. ఈసారి మాత్రం సినీ స్టార్లు తమ బంధువుల కోసం కాస్త ఆలస్యంగా ప్రచారంలోకి దిగుతున్నారు.
