తరవాత ఎవరితో సినిమా చేయాలన్న విషయంపై పూరి జగన్నాథ్ పెద్దగా ఆలోచించడు. ఎందుకంటే పూరి స్టామినా అలాంటిది. తను ఫ్లాపుల్లో ఉన్నా ఎవరికీ లొంగడు, భయపడడు. ఇండస్ట్రీలో ఉన్న ఏ హీరోతో అయినా వర్క్ చేయగల స్టామినా ఇప్పటికీ పూరిలో ఉంది. కాకపోతే సక్సెస్లో ఉన్నప్పుడు పూరి మాట వినడానికి హీరోలు సిద్ధంగా ఉంటారు. ఫెయిల్యూర్లో ఉన్నప్పుడు కాస్త కష్టం అవుతుంది అంతే తేడా! ప్రస్తుతం ‘డబుల్ ఇస్మార్ట్’తో బిజీగా ఉన్నాడు పూరి. ఈ సినిమా తరవాత పూరి ఎవరితో సినిమా చేస్తాడు? అనే విషయంపై టాలీవుడ్ లో ఆసక్తికరమైన చర్చ నడుస్తోంది. యంగ్ హీరో తేజా సజ్జాతో పూరి ఓ సినిమా చేస్తాడన్నది ఇన్ సైడ్ వర్గాల టాక్. అయితే.. పూరి ముందున్న ఆప్షన్ ఇదొక్కటే కాదు. మరో ఇద్దరు ముగ్గురు హీరోలతో పూరి టచ్లోనే ఉన్నాడు.
అందులో తొలి పేరు.. చిరంజీవిదే. చాలా కాలంగా చిరు – పూరి కాంబో కోసం ఆసక్తిగా ఎదురు చూస్తున్నారంతా. ఇద్దరికీ ఈ కాంబోని పట్టాలెక్కించాలన్న కుతూహలం ఉంది. చిరంజీవి ‘గాడ్ ఫాదర్’లో పూరి అతిథి పాత్రలో మెరిశాడు. కేవలం చిరు కోసమే పూరి కెమెరా ముందుకు వచ్చిన సందర్భం అది. అందుకే పూరిపై చిరుకి మరింత కన్సర్న్ మొదలైంది. పూరి కూడా చిరుకి తగిన కథ రెడీ అయిన తరవాతే, ఆయన దగ్గరకు వెళ్లాలని ఫిక్స్ అయ్యాడు. అలాంటి కథ ఇప్పుడు పూరి రెడీ చేశాడని సమాచారం.
మరోవైపు నాగార్జున కూడా పూరితో పని చేయడానికి పచ్చజెండా ఊపాడని తెలుస్తోంది. `సూపర్`, ‘శివమణి’ రూపంలో వీరిద్దరి నుంచి రెండు సినిమాలొచ్చాయి. ఇది హ్యాట్రిక్ కాంబో అవుతుంది. ఎప్పుడొచ్చినా ఈ కాంబోపై తప్పకుండా ఆసక్తి ఉంటుంది. సో.. చిరు, నాగ్, తేజ సజ్జా.. ఇలా పూరి ముందు ఆప్షన్లు అయితే కొన్ని ఉన్నాయి. వాటిలో ఏది ఫైనల్ అవుతుందో మరి!
