`విశ్వంభర` తరవాత ఏ సినిమా చేయాలన్న విషయంలో చిరంజీవి డైలామా కొంత వరకూ తీరింది. ఆయన తదుపరి సినిమాకు మోహన్ రాజా దర్శకత్వం వహించే అవకాశాలు ఉన్నాయి. ఈ చిత్రానికి బీవీఎస్ రవి కథని అందిస్తున్నారు. ప్రస్తుతం చెన్నైలో కథపై కసరత్తులు చేస్తున్నట్టు తెలుస్తోంది. ఈ క్రమంలోనే హరీష్ శంకర్ కూడా చిరుని కలిశారని, ఓ కథ చెప్పారన్న వార్తలు బయటకు వచ్చాయి. ఇప్పుడు వీటిపై హరీష్ క్లారిటీ ఇచ్చారు. చిరంజీవికి కథ చెప్పిన మాట వాస్తవమే అని, తమ కాంబోలో సినిమా ఉంటుందని, అయితే అది ఎప్పుడు? అనేది చిరంజీవినే స్వయంగా చెబుతారని తెలుగు 360కి ఇచ్చిన ఇంటర్వ్యూలో చెప్పుకొచ్చారు హరీష్. సో.. చిరు – హరీష్ కాంబో ఆల్మోస్ట్ ఫిక్సయిపోయినట్టే.
మెగా హీరోలంటే హరీష్ కు ప్రత్యేకమైన అభిమానం. పవన్ కల్యాణ్, సాయిధరమ్, వరుణ్తేజ్లతో సినిమాలు చేశారు. చిరంజీవితో మాత్రం ఓ సినిమా బాకీ పడిపోయారు. చిరుకి వీరాభిమాని అయిన హరీష్.. ఆయన్ని ఎలా చూపిస్తారో అనే ఉత్సుకత, ఉత్సాహం మెగా అభిమానుల్లో ఉన్నాయి. ”గ్యాంగ్ లీడర్, రౌడీ అల్లుడు సినిమాలు చూస్తూ పెరిగాము. ఓ అభిమానిగా ఆయన్ని ఎలాంటి సినిమాల్లో చూడాలనుకొన్నానో, ఆయనతో సినిమా అలానే ఉంటుంది” అంటూ అభిమానులకు తన సినిమాకు సంబంధించి హింట్ ఇచ్చేశారు. హరీష్ అంటే మాస్ కమర్షియల్ సినిమాలకు కేరాఫ్. చిరుకి ఇలాంటి కథలు నల్లేరుపై నడకే. ఆయన ఫ్యాన్స్ కూ ఆయన్ని అలాంటి సినిమాల్లోనే చూడాలని వుంది. మరి ఈ కాంబో ఎప్పుడు సెట్స్పైకి వెళ్తుందో?
