ఓ అబ్బాయి, ఓ అమ్మాయి.. చుట్టూ వంద‌ల‌మంది చుట్టాలు, పెళ్లి హ‌డావుడి… ఈ ఫ్రేమ్ చూడ్డానికి కృష్ణ‌వంశీ సినిమాలా క‌ల‌ర్‌ఫుల్‌గా ఉంటుంది క‌దూ. స‌రిగ్గా ఇలాంటి క‌థే చూపించ‌బోతున్నాడు ల‌క్ష్మ‌ణ్ కార్య‌. యూవీ క్రియేష‌న్స్ తెర‌కెక్కించిన ‘హ్యాపీ వెడ్డింగ్‌’కి ఆయ‌నే ద‌ర్శ‌కుడు. సుమంత్ అశ్విన్‌, నిహారిక జంట‌గా న‌టించారు. ట్రైల‌ర్ విడుద‌లైంది. 90 సెక‌న్ల ఆ ప్ర‌చార చిత్రం.. క‌ల‌ర్‌ఫుల్‌గా క‌నిపించింది. పెళ్లి కుదిరిన ఓ జంట మ‌ధ్య జ‌రిగే స‌ర‌దాలు, సంఘ‌ర్ష‌ణ‌లు, చిగురించిన ప్రేమ‌, చిన్న పాటి క‌ల‌హాలు, పెద్ద‌ల పంతాలు.. ఇవ‌న్నీ రంగ‌రించి ఈ సినిమా తీసిన‌ట్టు అనిపించింది. కెమెరా వ‌ర్క్ చాలా బాగుంది. హీరో, హీరోయిన్ల జంట చూడ‌ముచ్చ‌ట‌గా క‌నిపించింది. త‌మ‌న్ అందించిన నేప‌థ్య సంగీతం ఆక‌ట్టుకుంటోంది. ఇంటిల్లిపాదీ చూసేలా ఈసినిమాని తెర‌కెక్కించార‌న్న సంగ‌తి అర్థ‌మ‌వుతోంది. సుమంత్ అశ్విన్ కంటే.. నిహారిక డామినేష‌నే ఎక్కువ‌య్యే ఛాన్స్ క‌నిపిస్తోంది. యూవీ క్రియేష‌న్స్ మంచి ఫామ్ లో ఉంది. చూస్తుంటే.. ఆ స్పీడు ఈ సినిమాతోనూ కొన‌సాగించే అవ‌కాశాలే ఎక్కువ‌గా క‌నిపిస్తున్నాయి.