టీఆర్ఎస్ నేతలకు.. తెలంగాణలో జరుగుతున్న రాజకీయాలను ఎలా ఎదుర్కోవాలో తెలియక మళ్లీ .. సమైక్య వాదుల కుట్రనడం ప్రారంభించేశారు. మండలి చైర్మన్ గుత్తా సుఖేందర్ రెడ్డి ఏడాదిగా కేసీఆర్పై సమైక్యవాదులు కుట్ర చేస్తున్నారని.. పదవి నుంచి దించేయాలనుకుంటున్నారని చెప్పుకొచ్చారు. రెండు రాష్ట్రాలను కలిపి మళ్లీ సమైక్య రాష్ట్రంగా చేయడానికి చంద్రబాబు కుట్ర పన్నుతున్నారని గుత్తా అంటున్నారు. కేసీఆర్ను మానసికంగా దెబ్బ కొట్టేందుకు వారు మూకుమ్మడి దాడి చేస్తున్నారని ధ్వజమెత్తారు.
ఏపీలో చేతకాక తెలంగాణలో ప్రజలను మభ్య పెట్టి కేసీఆర్ను అడ్డు తొలగించుకోవాలని రాష్ట్రాన్ని మళ్ళీ కబ్జా చేయడానికి వస్తున్నారని అన్నారు. బీజేపీ దత్త పుత్రిక షర్మిల పాదయాత్రల పేరుతో కేసీఆర్ ను అప్రతిష్ఠ పాలు చేస్తోందని విమర్శించారు. అవినీతికి పాల్పడి జైలుకు వెళ్లడమే కాకుండా ఐఏఎస్ అధికారులను కూడా జైలుకు పంపిన చరిత్ర వారిదని మండలి చైర్మన్ చెప్పుకొచ్చారు. తెలంగాణకు స్వీయ రాజకీయ అస్తిత్వమే ముక్యమని ఆయన చెప్పుకొచ్చారు.
కానీ తెలంగాణ స్వీయ రాజకీయ అస్తిత్వం అయిన టీఆర్ఎస్ను బీఆర్ఎస్గా మార్చి దేశాన్ని ఉద్దరించడానికి కేసీఆర్ బయలుదేరారనే సంగతిని గుత్తా మర్చిపోయారన్నసెటైర్లు వినిపిస్తున్నాయి. తెలంగాణలో ఏం జరిగినా సమైక్య వాదుల కుట్రలని.. రాజకీయం చేసుకోవడం.. అదే సమయంలో తాము దేశంలో సంచలనం సృష్టిస్తామని బయలుదేరడం .. దేనికీ పొంతన కుదరదని అంటున్నారు. టీఆర్ఎస్ మళ్లీ.. సెంటిమెంట్ రాజకీయాలేక మొగ్గుచూపుతోందని ఇటీవల ఆ పార్టీ నేతలు వరుసగా చేస్తున్న ప్రకటనతో అర్థమవుతోందన్న అబిప్రాయం వ్యక్తమవుతోంది.
