గుణ‌శేఖ‌ర్‌… తెలుగు చ‌ల‌న చిత్ర‌సీమ చూసిన ప్ర‌తిభావంత‌మైన ద‌ర్శ‌కుల‌లో ఆయ‌న ఒక‌డు. ఇండ‌స్ట్రీ ని షేక్ చేసే బ్లాక్ బ‌స్ట‌ర్ విజ‌యాల్ని అందించారు. మాస్‌, క‌మ‌ర్షియ‌ల్ క‌థ‌ల్ని కొత్త పంథాలో చూపించారు. అయితే గ‌త కొంత‌కాలంగా ఆయ‌న ప్ర‌యాణంలో ఒడిదుడుకులు ఎక్కువ‌య్యాయి. అటు ద‌ర్శ‌కుడిగా, ఇటు నిర్మాత‌గా ఫ్లాపుల్ని ఎదుర్కొన్నారు. ఎన్నో ఆశ‌లు పెట్టుకొన్న ‘శాకుంత‌ల‌మ్‌’ ఆయ‌న్ని బాగా నిరాశ ప‌రిచింది. ‘హిర‌ణ్య క‌శ్య‌ప‌’ చేద్దామ‌నుకొన్న ఆయ‌న ప్ర‌య‌త్నాల‌కు గండి ప‌డింది. మ‌ళ్లీ త‌న‌ని తాను నిరూపించుకోవాల్సిన అత్య‌వ‌స‌ర ప‌రిస్థితుల్లో ఆయ‌న ఓ ప్ర‌యోగం చేస్తున్నారు. అదే… ‘యుపోరియా’.

ఓ యూత్ ఫుల్ టైటిల్ ఎంచుకొన్న గుణ‌శేఖ‌ర్‌… ఈ సినిమా ద్వారా నూత‌న న‌టీన‌టుల్ని వెండి తెర‌కు ప‌రిచ‌యం చేస్తున్నాడు. తెర‌పై క‌నిపించే ప్ర‌తీ ఒక్క‌రికీ ఇది డెబ్యూ సినిమానే. అలా అంద‌ర్నీ కొత్త వారినే ఎంచుకోవడం గుణ శేఖ‌ర్ కు ఇదే తొలిసారి. అంతే కాదు.. ఈ సినిమా కోసం త‌న రెగ్యుల‌ర్ టీమ్ ని సైతం ప‌క్క‌న పెట్టాడు. సంగీత ద‌ర్శ‌కుడిగా కాల‌భైర‌వని ఎంచుకొన్నాడు. మిగిలిన సాంకేతిక నిపుణులకూ గుణ‌శేఖ‌ర్ తో ప‌ని చేయ‌డం కొత్తే. బ్యాన‌ర్ పేరు కూడా గుణ హ్యాండ్ మేడ్ ఫిల్మ్స్ గా మార్చేశారు. గుణ‌శేఖ‌ర్ సినిమాకంటూ కొన్ని కొల‌త‌లూ, తూనిక‌రాళ్లూ ఉంటాయి. వాట‌న్నింటినీ ప‌క్క‌న పెట్టి ఈ సినిమా తీసిన‌ట్టు అర్థ‌మ‌వుతోంది. ఫ్లాపుల్లో ఉన్న‌ప్పుడు కొత్త దారులు వెదుక్కొంటూ ప్ర‌యాణించ‌డం చాలా ముఖ్యం. కొత్త క‌థ‌లు, కొత్త టీమ్ తోడైతే – కొత్త ఆలోచ‌న‌లు వ‌స్తాయి. ఇప్పుడు గుణ‌శేఖ‌ర్ చేసింది అదే. ఈరోజు ‘యుపోరియా’ నుంచి ఫ‌స్ట్ గ్లింప్స్ బ‌య‌ట‌కు రాబోతోంది. ‘యుపోరియా’ ఎలా ఉండ‌బోతోందో మ‌చ్చుక్కి రుచి చూపించే సంద‌ర్భం ఇది. గుణ‌శేఖ‌ర్ టీమ్ తో పాటు త‌న జాత‌కం కూడా మారిందా, లేదా? అనేది ఉజ్జాయింపుగా ఈ గ్లింప్స్‌తోనే అర్థ‌మైపోతుంది. లెట్స్‌.. వెయిట్ అండ్ సీ.