సూపర్ స్టార్ రజనీకాంత్ అందరినీ ఆకర్షించే మాగ్నైట్. సినిమా అభిమానులంతా రజనీ అభిమానులే అని చెప్పడంలో ఎలాంటి అతిశయోక్తి లేదు. ఆయనో గొప్ప ట్రెండ్ సెట్టర్. క్రేజ్ లో ఎవరెస్ట్. అన్నిటికి మించి నిగర్వి. ఆయనలోని ఆ సుగుణమే ఆయనికు మరింత అభిమానులను తెచ్చిపెట్టింది. తనపై తనే సెటర్లు వేసుకొనే పెద్ద స్టారు రజనీ. ఆయన ఏ వేడుకలో మాట్లాడినా వున్నది వున్నట్లుగా చెప్పడానికే ఇష్టపడతారు. ఇప్పుడు తను వున్న స్థాయిని ప్రాజెక్ట్ చేసుకోవడం ఆయనకి అస్సల్ ఇష్టం వుండదు. తన బిగినింగ్ ను ఎప్పుడూ మర్చిపోరు రజనీ. తాజాగా ఆయన మరోసారి తన బిగినింగ్ డేస్ ను గుర్తు తెచ్చుకున్నారు. తనపై దర్శకుడు భారతీరాజాకు వున్న అభిప్రాయను మొహమాటం లేకుండా సభా ముఖంగా చెప్పారు.
భారతీరాజా ఇంటర్నేషనల్ ఇన్స్టిట్యూట్ ఆఫ్ సినిమా ప్రారంభోత్సవం పాల్గొన్న రజనీ.. ”అసలు రజనీని నటుడిగా ప్రేక్షకులు ఎలా అంగీకరించారో” అనే ప్రశ్న భారతీరాజాలో ఇప్పటికీ వుందని తనదైన శైలిలో నవ్వుతూ చెప్పారు. ”నాకు భారతీరాజా అంటే చాలా ఇష్టం. ఆయనకూ నేనంటే ఇష్టమే. కానీ ఆయన నన్ను నటుడిగా అంగీకరించేవారు కాదు. నా సుధీర్గ సినీ జీవితంలో భారతీరాజా రెండు సార్లు మాత్రమే నా డేట్స్ అడిగారు. ‘పదినారు వయదినిలే’(పదహారేళ్ల వయసు) సినిమా కోసం. రెండోది ఈ కార్యక్రమం కోసమే. బహుసా.. ”రజనీని నటుడిగా ప్రేక్షకులు ఎలా అంగీకరించారో” అనే భావన ఇంకా ఆయనలో వుందేమో”అని నవ్వేశారు రజనీ. ఎలాంటి బేషజం లేకుండా రజనీ నుండి వచ్చిన ఈ మాటలు కార్యక్రమంలో నవ్వులు పూయించాయి.
