చిరంజీవి నటిస్తున్న సోషియో ఫాంటసీ చిత్రం ‘విశ్వంభర’. వశిష్ట దర్శకత్వం వహిస్తున్న ఈ చిత్రంలో త్రిష కథానాయిక. ఈ చిత్రంలో చిరంజీవి భీమవరం దొరబాబుగా, ఐదుగురు చెల్లెమ్మలకు అన్నయ్యగా కనిపించనున్నారు. దాదాపు 40 శాతం షూటింగ్ కూడా పూర్తయ్యింది. త్వరలో మరో కొత్త షెడ్యూల్ మొదలు కాబోతోంది. ఇందులో త్రిష కూడా పాల్గొంటుంది. ఈ చిత్రానికి సంబంధించి ఓ గాసిప్ ఇప్పుడు టాలీవుడ్ లో చక్కర్లు కొడుతోంది. ‘విశ్వంభర’లో పవన్ కల్యాణ్ కూడా నటిస్తున్నారని, ఆయన అతిథి పాత్రలో మెరవబోతున్నారన్నదే ఆ గాసిప్. దాంతో మెగా అభిమానులు ఖుషీ అయిపోతున్నారు.
‘శంకర్ దాదా జిందాబాద్’ తరవాత చిరు సినిమాలో పవన్ కనిపించలేదు. ఇన్నాళ్లకు ఆ అవకాశం వచ్చిందనుకొన్నారంతా. అయితే.. నిజానికి ఈ సినిమాలో పవన్ స్పెషల్ ఎప్పీరియన్స్ లేదు. అదంతా ఒట్టిమాటే. ఈ సినిమాలో ప్రత్యేక పాత్రలంటూ ఏమీ ఉండవని, అన్నీ కథలో భాగంగానే వస్తాయని సన్నిహిత వర్గాలు చెబుతున్నాయి. పవన్తో ఓ గెస్ట్ రోల్ చేయించాలన్న ఆలోచనే తమకు లేదని స్పష్టం చేశాయి. సో..పవన్పై ఇది గాసిప్ మాత్రమే అనుకోవాలి. చిరంజీవికి పవన్ తో నటించాలని ఉంది. అయితే ఇలాంటి చిన్న చిన్న గెస్ట్ రోల్స్ లాంటివి కాదు. పూర్తి స్థాయి క్యారెక్టర్ ఏదైనా వస్తే తప్పకుండా చేయాలని చిరు ఎప్పటి నుంచో ఎదురు చూస్తున్నారు. కానీ అలాంటి కథే రావడం లేదు. ఏ దర్శకుడైనా చిరు, పవన్లకు సరిపడా మల్టీస్టారర్ తీసుకొస్తే, అప్పుడు చిరుతో పాటు అభిమానుల కల కూడా నెరవేరుతుంది.
