కార్తీ, అదితీరావు హీరోహీరోయిన్లుగా మణిరత్నం దర్శకత్వంలో రూపొందుతున్న సినిమా పోస్టర్ విడుదల అయ్యింది. ఈద్ సందర్భంగా తమిళంలో ఈ సినిమా పోస్టర్ ను విడుదల చేశారు. విడుదల అయ్యింది తమిళ పోస్టరే అయినా.. తెలుగు నాట ఉన్న మణిరత్నం అభిమానులు కూడా ఈ పోస్టర్ కు ఫిదా అయిపోయారు! పలువురు సెలబ్రిటీలు.. మణిరత్నం అభిమానులు ఈ పోస్టర్ ను షేర్ చేసుకున్నారు.
మణిరత్నం సినిమాల స్థాయికి తగ్గట్టుగా ఉన్న ఈ పోస్టర్ తెలుగు వెర్షన్ కోసం ఇప్పుడు ఎదురుచూపులు మొదలయ్యాయి. తమిళంలో ఈ సినిమాను ‘కాట్రు వెలియిడాయ్’ పేరుతో రూపొందించాడు. తమిళ ప్రఖ్యాత రచయిత సుబ్రమణ్య భారతి కవిత ఒకదాని నుంచి మణిరత్నం ఈ సినిమా టైటిల్ ను తీసుకున్నాడు. మరి ఈ సినిమాకు తెలుగులో ఏం టైటిల్ పెడతారు? అనేది ఆసక్తికరమైన అంశం.
మణిరత్నం ఆస్థాన సంగీత దర్శకుడు ఏఆర్ రెహమాన్ ఈ సినిమాకు సంగీతాన్ని అందిస్తున్నాడు. ఇటీవలే ఈ కాంబినేషన్ ‘ఓకే బంగారం’ రూపంలో సత్తా చాటింది. ఆ సినిమా మరీ అంత హిట్ కాకపోయినా.. మణిరత్నం కొంత వరకూ బ్యాక్ అనిపించింది. దీంతో మణిరత్నం అభిమానుల్లో, సినీ ప్రేక్షకుల్లో ఈ తాజా సినిమాపై ఆసక్తి పెరిగింది.
