వైరస్ ట్రీట్మెంట్ విషయంలో వస్తున్న విమర్శలకు చెక్ పెట్టేందుకు తెలంగాణ ప్రభుత్వం అనూహ్యమైన నిర్ణయం తీసుకుంది. ఇక ముందు ప్రైవేటు ఆస్పత్రుల్లో కూడా కరోనాకు ఉచిత వైద్యం అందించాలని నిర్ణయించింది. టెస్టులు కూడా.. ఉచితంగా చేయాలని ప్రైవేటు ఆస్పత్రులకు దిశానిర్దేశంమ చేస్తోంది. ముందుగా మూడు భారీ ప్రైవేటు మెడికల్ కాలేజీలు.. ఆస్పత్రులను.. ఈ దిశగా.. ఉచిత చికిత్స ఇవ్వాలని ఆదేశాలు జారీ చేసింది. మల్లారెడ్డి మెడికల్ కాలేజ్, మమతా మెడికల్ కాలేజ్, కామినేని మెడికల్ కాలేజీల్లో మొదట కరోనా టెస్ట్లు, కరోనా చికిత్సలు ఉచితంగా అందించనున్నారు.
ముందు ముందు భారీ ప్రైవేటు మెడికల్ కాలేజీ ఆస్పత్రులతోపాటు.. కార్పొరేట్ ఆస్పత్రులకు కూడా.. ఈ ఉచిత కరోనా టెస్టులు, చికిత్స విధానాన్ని విస్తరించాలన్న ఆలోచనలో తెలంగాణ ప్రభుత్వం ఉంది. ఈ ఉచిత టెస్టులు, చికిత్స విధివిధానాలు ఖరారు కావాల్సి ఉంది. తెలంగాణ సర్కార్.. కరోనా విషయంలో… పెద్దగా పట్టనట్లుగా వ్యవహరిస్తోందని.. హైకోర్టు తీవ్రంగా మండిపడిన తర్వాతి రోజే… ఈ కీలకమైన నిర్ణయం తీసుకుంది. ప్రజలకు సరైన కరోనా వైద్యం అందడం లేదంటూ.. హైకోర్టులో అదే పనిగా పిటిషన్లు దాఖలవుతున్నాయి. టెస్టుల కోసం రోజుల తరబడి ఎదురు చూడాల్సి వస్తోంది. అదే సమయంలో.. పాజిటివ్ వచ్చిన వారిని ఆస్పత్రుల్లో చేర్చుకోవడం లేదు. హోం ఐసోలేషన్ అంటూ.. ఇంటికే పంపించేస్తున్నారు.
ప్రైవేటు ఆస్పత్రుల్లో చేరదామనుకునేవారికి అవకాశం దక్కడం లేదు. ఏ ఆస్పత్రి చేర్చుకోవడం లేదు. బెడ్లు ఖాళీ లేవని చెబుతున్నారు. అయితే.. ఇతర రాష్ట్రాల నుంచి వీఐపీలు వస్తే క్షణాల్లో వారిని చేర్చేసుకుంటున్నారు. ఈ పరిణామాలన్నింటిపై… తెలంగాణలో ఆందోళన వ్యక్తమవుతోంది. దీనిపై హైకోర్టు కూడా స్పందించింది. ఇప్పుడు ప్రభుత్వం కూడా కదిలింది. అయితే.. ప్రకటనలకే కాకుండా… సీరియస్గా ప్రైవేటు ఆస్పత్రుల్లోనూ.. టెస్టులు, చికిత్స ఉచితంగా అందేలా చూడాలన్న విజ్ఞప్తులు ప్రభుత్వానికి ఎక్కువగా వస్తున్నాయి.
