రెచ్చగొట్టే ప్రసంగాలు చేసే నాయకుల నోటి దూకుడుకు ఇప్పుడు కళ్లెం పడుతోంది. ఎందుకైనా మంచిది.. ఎన్నికల సంఘం కన్నెర్ర చేయకముందే.. నోటికి తాళాలు వేసుకోవడం మంచిదని నాయకులు అనుకుంటున్నారు. ప్రస్తుతం గ్రేటర్లో జరుగుతున్న ఎన్నికలలో ప్రచార నిమిత్తం అన్ని పార్టీల నాయకులు ప్రజలనుద్దేశించి చేస్తున్న ప్రసంగాలను ఎన్నికల అధికారులు పరిశీలిస్తున్నారు. ఎందుకంటే కొంత మంది నేతలు ఇది మా నియోజక వర్గమే కదా ఇక్కడ నాకు తప్ప వేరే పార్టీకి ఓటు వేయకూడదనే ధోరణిలో ప్రసంగాలనే కాకుండా నాయకులను, ప్రజలను కూడా అసౌకర్యానికి గురిచేస్తున్న నేపధ్యంలో ఎన్నికల అధికారులు వారి ప్రసంగాలను , వీడియోలను ఎక్కడ ఏ నాయకుడు ఏ విధంగా మాట్లాడాడు, అతడు ప్రజలను ఇబ్బంది పెట్టే విధంగా మాట్లాడాడా లేకా మామూలుగానే మాట్లాడాడా అనే విషయాలను పరిశీలించి తద్వారా చర్యలను తీసుకోనున్నారు. అందువల్ల ఇప్పటి నుండి ఇక ఏ నేతలైనప్పటికీ తమ నోటిని కొంచెం అదుపులో ఉంచుకొని హామీలను గానీ, మాటలను గానీ మాట్లాడేదుంటుందనీ పరిశీలకులంటున్నారు.
ఎందుకంటే ఇంతకు ముందు కూడా కొంత మంది నాయకులు రెచ్చగొట్టే విధంగా ప్రసంగించారు అనే నేపధ్యంలో వారిపై కేసులు కూడా నమోదయ్యాయి. ఈ సారి కూడా కొన్ని పార్టీలకు సంబందించిన నాయకులు మాట్లాడినట్టుగా వినికిడి. కానీ అటువంటి వారిని అది మొదటి తప్పుగా వదిలేస్తారో లేక దానిని కూడా పరిగణనలోకి తీసుకుంటారో చూడాలి.
హోదా, డబ్బు, మంది, మార్బలం ఉంది కదా అని మీ ఇష్టం వచ్చినట్లు మాట్లాడి ప్రజల మనోభావాలను చెడగొట్టేవిధంగా మాట్టాడితే ఇక తను ప్రజల మద్దతుతో ప్రజల మధ్య తిరగవలసింది పోయి, హాయిగా చర్లపల్లి జైల్లో చిప్పకూడు తినవలసిన పరిస్థితి వస్తుందనీ ప్రజా సంఘాలు అంటున్నాయి. కాబట్టీ నేతలు జర జాగ్రత్త అదుపు అదుపు మాట పొదుపు అనుకుంటూ నాయకులు ముందుజాగ్రత్త చర్యలు పాటిస్తున్నారు.
