కల్కి తర్వాత అల్లు అర్జున్ పుష్ప 2 కోసమే ఇండస్ట్రీ అంతా ఎదురుచూస్తోంది. పార్ట్ 1 ఘన విజయం సాధించడంతో సినిమాపై బోలెడు అంచనాలు వున్నాయి. పాన్ ఇండియా లెవల్ లో సినిమాని తీర్చిదిద్దితున్నారు. ఆగస్ట్ 15న ఈ సినిమా రిలీజ్ చేస్తున్నట్లు ఇదివరకే ప్రకటించారు. ఇప్పటివరకు ఇది సోలో డేట్ గానే కనిపించింది. అయితే ఇప్పుడీ బరిలోకి రామ్ దిగాడు.

రామ్ పూరి జగన్నాథ్ కాంబినేషన్ లో వస్తున్న సినిమా డబుల్ ఇస్మార్ట్. ఇస్మార్ట్ శంకర్ కి సీక్వెల్ ఇది. ఇప్పుడీ సినిమా రిలీజ్ డేట్ అనౌన్స్ చేశారు. సరిగ్గా ఆగస్ట్ పదిహేనుకే వస్తుంది డబుల్ ఇస్మార్ట్. రామ్ పూరి కాంబినేషన్ లో వచ్చిన ఇస్మార్ట్ శంకర్ మంచి మాస్ హిట్ అయ్యింది. అప్పట్లో ఈ ఇద్దరి కెరీర్ కి బూస్ట్ ఇచ్చింది. తర్వాత ఈ ఇద్దరికీ స్కంద, లైగర్ లాంటి డిజాస్టర్లు పడ్డాయి. డబుల్ ఇస్మార్ట్ ఈ ఇద్దరికీ చాలా కీలకం. ఇలాంటి సందర్భంలో పుష్పతో పాటే బరిలో దిగాలని నిర్ణయించుకోవడం ఆసక్తికరమే.

అయితే ఇందులో అసలైన ఇంకో కోణం వుంది. పుష్ప2 వాయిదా పడుతుందనే వార్తలు బయటికి వచ్చాయి. సినిమా ఆగస్ట్ 15కి రాదనే టాక్ ఇండస్ట్రీ వర్గాల నుంచి బయటికి వచ్చింది. ఈ నేపధ్యంలో డబుల్ ఇస్మార్ట్ శంకర్ అదే డేట్ కి అనౌన్స్ చేయడంతో పుష్ప ఇక రానట్లే అనే వార్తలకు బలం చేకూరినట్లయింది.