కుమారి 21 ఎఫ్తో ఆకట్టుకొన్న దర్శకుడు సూర్య ప్రతాప్. ఈ సుకుమార్ శిష్యుడికి గురువు అండదండలు గట్టిగా ఉన్నాయి. ఆ ప్రోత్సాహంతోనే `18 పేజీస్` సినిమా తీశాడు. అది కూడా బాగానే ఆడింది. అయితే ఆ తరవాత సూర్య కుమార్ నుంచి సినిమా ఏదీ రాలేదు. ఇప్పుడు బాలీవుడ్ లో ఓ సినిమా చేయడానికి సమాయాత్తం అవుతున్నాడని తెలుస్తోంది.
కనెక్ట్ మీడియా సంస్థ సూర్య ప్రతాప్ తో ఓ సినిమా చేయబోతోందని టాక్. అందుకోసం ఓ బాలీవుడ్ హీరోని వెదికే పనిలో ఉన్నాడు సూర్య ప్రతాప్. ప్రస్తుతం ఆయన ముంబైలోనే ఉన్నారు. టైగర్ ష్రాఫ్తో ఆయన సంప్రదింపులు జరుపుతున్నట్టు టాక్. అంతా ఓకే అయితే… టైగర్తోనే సూర్య ప్రతాప్ సినిమా ఉండొచ్చు. అయితే ఈ ప్రాజెక్ట్ వెనుక గురువు సుకుమార్ హస్తం ఉందో లేదో తెలియాల్సివుంది. కుమారి 21, 18 పేజీస్ చిత్రాలు సుకుమార్ రైటింగ్స్ బ్యానర్లో నిర్మించారు. ఆ కథలో, స్క్రీన్ ప్లేలో సుకుమార్ సలహాలూ, సూచనలు బాగా ఉపయోగపడ్డాయి. మరి ఆయన ఈ ప్రాజెక్ట్ లోనూ ఉంటారా, లేదా? అనేది తెలియాలంటే ఇంకొంత కాలం ఆగాలి.
