ప్రభాస్ – హను రాఘవపూడి కాంబినేషన్లో ఓ చిత్రం రూపుదిద్దుకొంటున్న సంగతి తెలిసిందే. 1945 నేపథ్యంలో సాగే పిరియాడికల్ డ్రామా ఇది. యుద్ధ నేపథ్యంలో సాగే ప్రేమ కథ. ఈ సినిమాలో హీరోయిన్ పాత్ర చాలా కీలకం. హను సినిమాల్లో హీరోయిన్ల పాత్రలు బాగా హైలెట్ అవుతుంటాయి. ‘అందాల రాక్షసి’ నుంచి ‘సీతారామం’ వరకూ ఆయన కథల్లో హీరోయిన్లు మెరిశారు. ఇప్పుడు కూడా హీరోయిన్కు అంతటి ప్రాధాన్యం ఉన్న పాత్రే అని టాక్. అందుకోసం కథానాయికల వేట మొదలైంది.
ప్రభాస్ ఇమేజ్కీ, ఈ సినిమా స్పాన్కీ తగ్గట్టుగా బాలీవుడ్ నుంచి హీరోయిన్ ని తీసుకొద్దామనుకొన్నారు. దీపికా పదుకొణె, అలియాభట్ లాంటి పేర్లు పరిశీలనకు వచ్చాయి. అయితే.. సమస్యల్లా, హీరోయిన్ కాల్షీట్లు గంపగుత్తగా కావాలి. కనీసం 100 నుంచి 120 రోజుల కాల్షీట్లు కేటాయించాలి. దాదాపుగాద సినిమా జరిగినన్ని రోజులూ హీరోయిన్ సెట్లో ఉండాల్సిందే. ఇన్నిన్ని కాల్షీట్లు ఇవ్వడం ఈతరం స్టార్ హీరోయిన్లకు కష్టమైన పనే. అందుకే హీరోయిన్ దొరకడం లేదు. అందుకే ఈసారి కొత్త ఓ కొత్త కథానాయికని వెదికి పట్టుకొందాం అనే ఆలోచనల్లో ఉన్నాడు హను. ‘అందాల రాక్షసి’,’కృష్ణగాడి వీర ప్రేమగాథ’, ‘సీతారామం’ ఈ సినిమాల్లో నటించిన హీరోయిన్లంతా అప్పటికి కొత్తవాళ్లే. ఆ సినిమాలతోనే వాళ్లు పాపులర్ అయ్యారు. అందుకే మరోసారి కొత్తమ్మాయికే ఓటేయ్యాలని భావిస్తున్నాడు. అయితే ప్రభాస్ పక్కన కొత్తమ్మాయి అంటే ఫ్యాన్స్ ఎలా రివీవ్ చేసుకొంటారో? అనే భయం హనుని వెంటాడుతోంది. అందుకే ఈ విషయంలో తర్జనభర్జనలు జరుగుతున్నాయి. ఆగస్టు లేదా సెప్టెంబరులో ఈ సినిమా పట్టాలెక్కబోతోంది. ప్రస్తుతం మ్యూజిక్ సిట్టింగ్స్ జరుగుతున్నాయి. రెండు పాటలు కూడా రెడీ అయ్యాయని టాక్.
