మ‌హేష్ బాబు – శ్రీ‌నువైట్ల క‌ల‌యిక‌లో వ‌చ్చిన ‘దూకుడు’ సూప‌ర్ డూప‌ర్ హిట్ట‌య్యింది. అప్ప‌టికి… మ‌హేష్ కెరీర్‌లో అదే పెద్ద హిట్. శ్రీ‌నువైట్ల స్టామినా ఏమిటో నిరూపించింది. ‘దూకుడు’ ఇచ్చిన న‌మ్మ‌కంతో `ఆగ‌డు` తీస్తే.. అది ఫ‌ట్టుమంది. అక్క‌డి నుంచి శ్రీ‌నువైట్ల దూకుడు బాగా త‌గ్గిపోయింది. వ‌రుస ఫ్లాపులు ప‌ల‌క‌రించాయి. ఇప్పుడాయన `ఢీ` కి సీక్వెల్ గా `డీ అండ్ డీ` తీస్తున్నాడు. దాంతో పాటు `దూకుడు 2` స్క్రిప్టుని రెడీ చేసేసుకున్న‌ట్టు టాక్‌. లాక్ డౌన్ స‌మ‌యంలో `దూకుడు 2` చేయాల‌న్న ఆలోచ‌న వ‌చ్చి, స్క్రిప్టు ప‌నులు మొద‌లెట్టార్ట‌. అవ‌న్నీ ఇప్పుడు పూర్త‌యిపోయాయ‌ని తెలుస్తోంది. మ‌హేష్ అవ‌కాశం ఇస్తే… ఈ క‌థ‌ని వినిపించాల‌ని శ్రీ‌నువైట్ల భావిస్తున్నాడు. `దూకుడు` ఇచ్చిన గౌర‌వంతో.. శ్రీ‌నువైట్ల‌కు మ‌హేష్ అప్పాయింట్మెంట్ ఇవ్వొచ్చు. క‌థ వినొచ్చు. కాక‌పోతే.. ఇప్పుడు శ్రీ‌నువైట్ల‌కు కాల్షీట్లు ఇచ్చే తీరిక మాత్రం మ‌హేష్‌కు లేదు. `స‌ర్కారు వారి పాట‌` పూర్త‌యిన వెంట‌నే… రాజ‌మౌళి సినిమా మొద‌ల‌వుతుంది. ఆ త‌ర‌వాత‌.. త్రివిక్ర‌మ్ లైన్‌లో ఉన్నాడు. అప్ప‌టి వ‌ర‌కూ శ్రీ‌నువైట్ల ఆగాలి. అన్నింటికంటే ముఖ్యంగా `ఢీ 2` సీక్వెల్ హిట్ట‌వ్వాలి. అప్పుడే `దూకుడు`పై న‌మ్మ‌కాలు క‌లుగుతాయి.