‘డీజే టిల్లు’తో స్టార్ డమ్ సంపాదించుకొన్నాడు… సిద్దు జొన్నలగడ్డ. ‘టిల్లు స్క్వేర్’ సూపర్ హిట్ కొట్టడంతో… తన పాపులారిటీ మరింత పెరిగింది. ఇప్పుడు అందరి దృష్టీ.. ‘టిల్లూ క్యూబ్’పై ఉంది. ఈలోగా సిద్దు జొన్నల గడ్డ నుంచి మరో సినిమా వస్తోంది. అదే.. ‘జాక్’. బొమ్మరిల్లు భాస్కర్ దర్శకత్వం వహిస్తున్న ఈ చిత్రం ప్రస్తుతం సెట్స్పై ఉంది. బొమ్మరిల్లు భాస్కర్ది డిఫరెంట్ స్టైల్. సిద్దూ బాడీ లాంగ్వేజ్ వేరు. వీరిద్దరికీ ఎలా సెట్ అవుతుందా.. అని అంతా ఆసక్తిగా ఎదురు చూస్తున్నారు.
ఈ చిత్రానికి సంబంధించి ఇప్పుడు ఓ ఇంట్రస్టింగ్ విషయం తెలిసింది. నిజానికి ‘జాక్’ కథ… సిద్దుని దృష్టిలో ఉంచుకొని రాయలేదు. ఈ కథకు ముందు అనుకొన్న హీరో ధనుష్. తనతో బొమ్మరిల్లు భాస్కర్ ఓ సినిమా చేద్దామనుకొన్నాడు. ఈ కథ పట్టుకొని ధనుష్ చుట్టూ తిరిగాడు. ధనుష్కి కూడా ఈ కథ నచ్చింది. అయితే ఎందుకో మరి ఈక్వేషన్స్ కుదర్లేదు. ఆ తరవాతే.. ఈ కథ సిద్దు జొన్నలగడ్డ దగ్గరకు వచ్చింది. సిద్దు, ధనుష్ వీరిద్దరి ఇమేజ్లు వేరు. ధనుష్ కోసం రాసిన కథని.. సిద్దు కోసం ఎలా మ్యాచ్ చేశాడో? బొమ్మరిల్లు భాస్కర్పై ఓరకమైన ఇమేజ్ ఉంది. క్లీన్ సినిమాలు తీస్తాడని పేరు తెచ్చుకొన్నాడు. ఈ సినిమా ఆ ఇమేజ్కు కూడా దూరంగా ఉండబోతోందని టాక్. సిద్దు సినిమా అంటే ఇప్పుడు లిప్ లాక్లు కామన్ అయిపోయాయి. అలాంటి హాట్ దృశ్యాలు ‘జాక్’లో చాలా ఉండబోతున్నాయని తెలుస్తోంది.
