ఒకప్పుడు దేవిశ్రీ ప్రసాద్ ఆల్బమ్ అంటే ఆరింటికి ఆరూ సూపర్ హిట్ గీతాలొచ్చేవి. ఇప్పుడు ఆరు పాటల్లో ఒక్కటి హిట్ అవ్వడమే గగనం అయిపోయింది. దేవి పాటలపై కాపీ ముద్ర కూడా పడడం… అతని పాటలపై మాయని మరకగా మిగులుతోంది. దానికి తోడు తమన్ మరోవైపు దూసుకుపోతున్నాడు. తమన్ వన్నీ మ్యూజికల్ హిట్సే. ఆల్బమ్లో ఒక్క పాటైనా…. రికార్డు స్థాయిలో మార్మోగుతోంది. దాంతో దేవిశ్రీ పై ఒత్తిడి పెరిగిపోయింది. ఇప్పుడు తన ముందున్న మార్గం ఒక్కటే. మరో సూపర్ హిట్ ఆల్బమ్ తో ట్రాక్ లోకి రావడం. ఈమధ్య `ఉప్పెన` చిత్రంలో ఓ మంచి పాట అందించాడు దేవి. ఈ పాటతో దేవీ మ్యాజిక్ మళ్లీ కనిపించింది, వినిపించింది. ఇప్పుడు మరో అవకాశం దేవి ముంగిట ఉంది. అదే సుకుమార్ తో సినిమా.
సుకుమార్ – దేవిశ్రీలది ఎవర్ గ్రీన్ కాంబినేషన్. ఇప్పటి వరకూ సుకుమార్ దేవిని వదిలిపెట్టలేదు. సుకుమార్ సినిమా అనగానే దేవి కూడా అదే స్థాయిలో రెచ్చిపోయి పాటలిస్తాడు. ఫామ్ లో లేనప్పుడు కూడా `రంగస్థలం` ఆల్బమ్ తో దేవి అదరగొట్టాడు. `అల వైకుంఠపురములో` సినిమాకి తమన్ మంచి పాటలిచ్చిన్పపటికీ, దేవిశ్రీ ఎంపికను బన్నీ కూడా కాదలేకపోయాడు. దానికి కారణం… దేవిశ్రీతో బన్నీకి ఉన్న అనుబంధం. అల్లు అర్జున్కి కూడా దేవి మంచి పాటలే ఇచ్చాడు. ఇప్పుడు అటు బన్నీని, ఇటు సుక్కునీ, మొత్తంగా తన అభిమానుల్ని సంతృప్తిపరచాల్సిన బాధ్యత దేవిశ్రీపై ఉంది. ఈ సినిమాకి మంచి పాటలిస్తే సరేసరి. లేదంటే.. దేవిశ్రీ కోలుకోవడం కష్టమే.
