‘ఆర్‌.ఆర్‌.ఆర్‌’ త‌ర‌వాత ఎన్టీఆర్ చేస్తున్న సినిమా ‘దేవ‌ర‌’. కొర‌టాల శివ ద‌ర్శ‌క‌త్వం వ‌హిస్తున్నారు. దేవ‌ర టీజ‌ర్ కోసం ఎన్టీఆర్ ఫ్యాన్స్ ఎప్ప‌టి నుంచో ఎదురు చూస్తున్నారు. చిత్ర‌బృందం కూడా ‘టీజ‌ర్ అదిరిపోయింది… త్వ‌ర‌లోనే విడుద‌ల చేస్తాం’ అని ఊరిస్తూ వ‌చ్చింది. ఇప్పుడు ‘దేవర‌’ టీజ‌ర్ వ‌చ్చేసింది. 80 సెక‌న్ల ఈ టీజ‌ర్లో ఎప్ప‌టిలానే ఎన్టీఆర్ విధ్వంసం క‌నిపించింది. స‌ముద్రంపై.. ఓడ‌, దానిపై ముష్క‌రుల దాడి, వాళ్ల‌పై ఎన్టీఆర్ చేసిన పోరాటం.. ఇదీ ‘దేవ‌ర‌’ టీజ‌ర్‌లో క‌నిపించిన విశేషాలు. ఓ ఇంగ్లీష్ పాట‌తో అనిరుథ్ ఈ సినిమా జిస్ట్ మొత్తం చెప్పే ప్ర‌య‌త్నం చేశాడు. అనిరుథ్ ఆర్‌.ఆర్ ఎప్ప‌టిలానే ప‌వ‌ర్‌ఫుల్‌గా సాగిపోయింది.

ఇన్ని ఉన్నా – ఎన్టీఆర్ నోటి నుంచి డైలాగ్ విన‌క‌పోతే వెలితిగా ఉంటుంది క‌దా? అందుకే ఆ లోటు తీరుస్తూ… చివ‌ర్లో ఎన్టీఆర్ ”ఈ స‌ముద్రం చేప‌ల కంటే, రక్తాన్నే ఎక్కువ చూసింది. అందుకే దీన్ని ఎర్ర స‌ముద్రం అంటారు” అంటూ ఓ డైలాగ్ వ‌లిలాడు. విజువ‌ల్ గా ఈ సినిమా రిచ్‌గా క‌నిపిస్తోంది. యాక్ష‌న్‌కి పెద్ద పీట వేశార‌న్న సంగతి అర్థ‌మ‌వుతోంది. సాబు సిరిల్ ప్రొడ‌క్ష‌న్ డిజైనింగ్ కి కూడా మంచి మార్కులు ప‌డ‌బోతున్నాయి. 2024 వేస‌వి ‘దేవ‌ర‌’దే అని న‌మ్ముతున్న వాళ్ల‌కు ఈ టీజ‌ర్ మ‌రింత ఉత్సాహాన్ని అందిస్తుంద‌న‌డంలో ఎలాంటి సందేహం లేదు.