ఈనెల 12 నుంచి టాలీవుడ్ లో సంక్రాంతి సంబరాలు మొదలవుతాయి. అయితే పండగ ఉత్సాహాన్ని ముందే తీసుకొస్తున్నాడు ఎన్టీఆర్. తన తాజా చిత్రం ‘దేవర’. కొరటాల శివ దర్శకత్వం వహిస్తున్న ఈ చిత్రంలో జాన్వీ కపూర్ కథానాయికగా నటిస్తోంది. కల్యాణ్ రామ్ నిర్మాత. ఈనెల 8న ఫస్ట్ గ్లింప్స్ విడుదల చేయబోతున్నారు. ఈ విషయాన్ని చిత్రబృందం అధికారికంగా ప్రకటించింది. ‘దేవర’ని రెండు భాగాలుగా రూపొందిస్తున్న సంగతి తెలిసిందే. తొలి భాగం షూటింగ్ 80 శాతం పూర్తయ్యింది. గ్లింప్స్ కూడా రెడీగా ఉంది. మంచి ముహూర్తం చూసి వదలాలని చిత్రబృందం భావించింది. ఇప్పుడు గ్లింప్స్ రిలీజ్ డేట్ ఫిక్స్ చేశారు.
ఈ సందర్భంగా ఓ కొత్త పోస్టర్ని కూడా వదిలారు. సముద్రం హోరులో.. పడవపై ఓ కెరటంలా దూసుకొస్తున్న ఎన్టీఆర్ స్టిల్.. ఆయన అభిమానుల్ని ఆకట్టుకొనేలా ఉంది. ‘ఆర్.ఆర్.ఆర్’ తరవాత ఎన్టీఆర్ నుంచి వస్తున్న సినిమా ఇదే. కాబట్టి అంచనాలు తారా స్థాయిలో ఉన్నాయి. అనిరుథ్ సంగీతాన్ని అందిస్తున్నాడు. ఇటీవల టీజర్కి ఆర్.ఆర్.కూడా పూర్తి చేశాడు. ‘గ్లింప్స్ ఓ రేంజ్లో ఉండబోతోంది’ అంటూ అనిరుథ్ కూడా అభిమానులకు ఊరించే మాట ఒకటి చెప్పాడు. అప్పటి నుంచీ గ్లింప్స్ కోసం ఫ్యాన్స్ నిరీక్షణలో పడిపోయారు.
