డాన్కి, డాక్టర్కి ఎలా స్నేహం కుదురుతుందబ్బా? ‘దేవదాస్’లో కింగ్ నాగార్జున, నేచురల్ స్టార్ నాని పాత్రల గురించి వివరాలు బయటకు వచ్చిన వెంటనే ప్రేక్షకుల్లో మొలకెత్తిన సందేహం! ఆ సందేహానికి టీజర్లోనే సమాధానమిచ్చాడు దర్శకుడు శ్రీరామ్ ఆదిత్య. చీప్ లిక్కర్ అనుకోండి… నాటు సారా అనుకోండి… కాస్ట్లీ స్కాచ్ అనుకోండి… అలవాటు వుండాలే గానీ, మనుషులను దగ్గర చేయని మందు లేదు. అదే డాన్ని, డాక్టర్ని దగ్గర చేసింది. నాగార్జున గ్లాసులో మందు పోశాడు. ‘సోడా కావాలా? వాటర్ కావాలా?’ అని అడిగాడు. ఈలోపు నాని రా తాగేశాడు. మరలా గ్లాసులో మందు పోశాడు. నాని మరలా తాగేశాడు. పెగ్గు మీద పెగ్గు కొట్టాడు. ‘దాసు… ఏంటి సంగతి?’ అని అడిగాడు దేవ! టీజర్లో ఇంతే వుంది. డైలాగులూ తక్కువే. కానీ, సన్నివేశం వినోదాత్మకంగా తెరకెక్కింది. దానికి కారణం… నాగార్జున, నాని నటనే! చిత్రంలోనూ ఇదేస్థాయిలో వీళ్లిద్దరి కెమిస్ట్రీ వుంటుందని వూహించవచ్చు. ఆకాంక్షా సింగ్, రష్మిక మందన్న కథానాయికలుగా నటిస్తున్న ఈ చిత్రాన్ని సెప్టెంబర్ 27న విడుదల చేయనున్నట్టు టీజర్లో స్పష్టం చేశారు. వైజయంతి మూవీస్ ఈ చిత్రాన్ని నిర్మించింది.
‘దేవదాస్’ టీజర్: పెగ్గు మీద పెగ్గు కొట్టు!
