‘కల్కి’ నుంచి దీపికా పదుకొణె తప్పుకోవడం ప్రస్తుతం టాలీవుడ్ లో హాట్ టాపిక్ గా మారింది. ‘నేను ఈ సినిమా చేయడం లేదు’ అని దీపిక ప్రకటించకముందే.. ‘దీపిక మా టీమ్ లో లేదు’ అని వైజయంతీ మూవీస్ స్వయంటా ట్వీట్ చేయడం.. ఆమెను తొలగించినట్టు చెప్పడంతో దీపిక మరింత హర్ట్ అయినట్టు తెలుస్తోంది.
అయితే.. దీపికను తొలగించిన వైనం వెనుక చాలా కొత్త కొత్త విషయాలు వెలుగులోకి వస్తున్నాయి. కల్కి 1 చేస్తున్నప్పుడు దీపిక రూ.9 కోట్ల వరకూ పారితోషికం తీసుకొందని సమాచారం. ఇప్పుడు ఆ పారితోషికాన్ని డబుల్ చేయాలని చూసిందట. కనీసం రూ.13 కోట్లు ఇస్తే గానీ, నేను ఈ సినిమాలో నటించను అని ఖరాఖండీగా చెప్పేసిందని ఇన్ సైడ్ వర్గాలు చెబుతున్నాయి.
దీపిక పారితోషికం భరించడం వైజయంతీ మూవీస్ లాంటి సంస్థకు భారం కాకపోవొచ్చు. కానీ దీపిక అసెస్టెంట్లను భరించడం మాత్రం ఎవ్వరికైనా ఇబ్బందే. ఎందుకంటే దీపిక వెనుక దాదాపు 25 మంది స్టాఫ్ ఉంటారని సమాచారం. మేకప్ అసిస్టెంట్లు, హెయిర్ డ్రస్సర్, కాస్టూమ్ అసిస్టెంట్స్, పర్సనల్ మేనేజర్, బౌన్సర్స్.. ఇలా దీపిక కదిలితే వెనుక పాతిక మంది సమూహం ఉంటుందట. వాళ్లందరి జీతభత్యాలు, బేటాలు, హోటెల్ రూములు అన్నీ నిర్మాణ సంస్థే భరించాలి. షూటింగ్ జరిగినన్ని రోజులు ఈ పాతిక మంది ని చూసుకోవాలంటే అదనంగా కనీసం రూ.4 కోట్లయినా అవుతుందని తెలుస్తుంది. హీరోయిన్లకు పారితోషికాలు ఇస్తూ, వాళ్ల స్టాఫ్ ని కూడా భరించడం కష్టసాధ్యమే. కల్కి 1 కోసం ఏదోలా తిప్పలు పడిన వైజయంతీ సంస్థ.. ఈసారి మాత్రం భరించలేక ఆమెను కాదనుకొంది.
స్టార్ డమ్ వచ్చిన తరవాత దాన్ని కాపాడుకోవడం – తమని నిలబెట్టిన నిర్మాతల గురించి ఆలోచించడం చాలామంది స్టార్లకు చేత కావడం లేదు. దీపిక ఇలానే నిర్మాతల్ని ఇబ్బంది పెడితే ఆమెతో సినిమా చేయడానికి ఏ నిర్మాతా ముందుకు రాడు. దీపిక లాంటి స్టార్ ని పక్కన పెట్టి, వైజయంతీ మూవీస్ గట్టి సంకేతాలనే పంపించినట్టైంది. దీపిక అంత కాకపోయినా తమ స్టాఫ్ల జీతాల్ని కూడా నిర్మాతల మీదే వేసేసే కథానాయికలు చాలామంది ఉన్నారు. వాళ్లంతా ఇప్పుడు అప్రమత్తమవ్వాల్సిందే.
