మహేష్, శ్రీకాంత్ అడ్డాల కాంబినేషన్లో పివిపి నిర్మిస్తున్న ‘బ్రహ్మూెత్సవం’ షూటింగ్ జరుగుతుండగానే మహేష్ నెక్స్ట్ సినిమా గురించి మీడియాలో హాట్ డిస్కషన్స్ స్టార్ట్ అయిన విషయం తెలిసిందే. ఎ.ఆర్.మురుగదాస్ దర్శకత్వంలో తెలుగు, తమిళ భాషల్లో రూపొందనున్న ఈ చిత్రానికి నిర్మాతలు ఎవరు అనే విషయం ఇప్పటికీ కన్ఫర్మ్ అవ్వనప్పటికీ హీరోయిన్ విషయంలో మాత్రం రకరకాల ఊహాగానాలు చేసేస్తున్నారు. అయితే ఈ సినిమాలో హీరోయిన్గా ఎవరిని తీసుకోవాలని మహేష్, మురుగదాస్ డిస్కస్ చేస్తున్న విషయం మాత్రం వాస్తవం.
తనకు దీపికా పదుకొనే అంటే ఎంతో ఇష్టమని ఆమధ్య మహేష్ చెప్పిన విషయం తెలిసిందే. మహేష్లాంటి సూపర్స్టార్ తన గురించి అలా చెప్పడం తనకెంతో సంతోషాన్ని కలిగించిందని దీపికా ట్విట్టర్లో పోస్ట్ చేసిన విషయం కూడా మనకు తెలుసు. దీన్నిబట్టి వీళ్ళిద్దరి కాంబినేషన్లో ఒక సినిమా వుంటుందన్న వార్తలు ఆమధ్య వచ్చాయి. అది ఇప్పుడు మహేష్, మురుగదాస్ సినిమాకి నిజమయ్యే అవకాశాలు కనిపిస్తున్నాయి. హీరోయిన్ విషయంలో మహేష్ పట్టుపడుతున్నాడని తెలుగు360లో చెప్పినట్టుగానే తన సినిమాలో దీపికా పదుకొనే అయితేనే బాగుంటుందని మహేష్ సూచించాడట. దీంతో మురుగదాస్.. దీపికాను హీరోయిన్గా తీసుకునే విషయంలో చర్చలు జరుపుతున్నాడట. తెలుగు, తమిళ భాషల్లో హయ్యస్ట్ బడ్జెట్తో రూపొందుతున్న ఈ చిత్రం కోసం దీపికా ఎంతవరకు డేట్స్ అడ్జస్ట్ చెయ్యగలదు అనేది పెద్ద ప్రశ్నగా మారింది. అంతేకాకుండా ఒక సినిమాకి 6 కోట్లకు పైగా రెమ్యునరేషన్ తీసుకునే దీపికా కోసం అంత బడ్జెట్ పెట్టగలమా అనే ఆలోచన కూడా చేస్తున్నారట.
బాలీవుడ్లో ఓం శాంతి ఓం చిత్రంతో హీరోయిన్గా పరిచయమై చాలా తక్కువ టైమ్లోనే టాప్ హీరోయిన్గా ఎదిగిన దీపికా లవ్ ఆజ్ కల్, చెన్నయ్ ఎక్స్ప్రెస్, రామ్లీలా, బాజీరావ్ మస్తానీ వంటి సినిమాల్లో తన పెర్ఫార్మెన్స్తో అందర్నీ మెస్మరైజ్ చేసింది. పికు అనే చిత్రంలోని ఆమె నటనకుగాను బెస్ట్ యాక్ట్రెస్గా ఫిలిమ్ఫేర్ అవార్డును కూడా ఇటీవల అందుకున్న దీపికా.. మహేష్ కోసం తెలుగు సినిమాలో నటిస్తే అతని అభిమానులకు అంతకంటే ఆనందం ఏముంది?
