పవన్ కల్యాణ్ సినిమాల్లో నటించడంపై విమర్శలు వస్తున్నాయి. ఇంత వరకూ.. సినిమా రంగం నుంచి రాజకీయాల్లోకి వెళ్లిన ఏ ఒక్కరూ కూడా.. నటనను వదిలి పెట్టలేదు. వదిలి పెట్టలేరు కూడా. ఎందుకంటే.. గ్లామర్ ఫీల్డ్ కు ఉన్న ఆకర్షణ అలాంటిది. చాలా మంది.. ఇలా రాజకీయాల్లోకి వెళ్లి నటనను కొనసాగించారు. ఎవరిపైనా విమర్శలు రాలేదు. మొదటి సారి పవన్ కల్యాణ్ నటిస్తూంటే మాత్రం విమర్శలు వస్తున్నాయి. దానికి కారణం పవన్ కల్యాణే. ఎందుకంటే.. పవన్ కల్యాణ్.. తాను ఇక సినిమాల్లో నటించబోనని పలుమార్లు ప్రకటించారు. అందుకే.. గతంలో సినిమాలు చేయబోనని ప్రకటించి.. ఇప్పుడెందుకు చేస్తున్నారన్న విమర్శలు రావడానికి కారణం అవుతోంది.
కొన్ని సందర్భాల్లో .. వైఎస్ఆర్ కాంగ్రెస్ పార్టీ చక్కగా పరిపాలిస్తే.. తానెందుకు రోడ్ల మీదకు వస్తానని.. చక్కగా వెళ్లి సినిమాలు చేసుకుంటానని ప్రకటించారు. ఇప్పుడు ఆయన సినిమాలు చేసుకుంటూంటే.. తాము బాగా పరిపాలిస్తున్నామనే కదా అర్థం అని వైసీపీ నేతలు అంటున్నారు. రాజకీయ నేతలు సందర్భానికి తగ్గట్లుగా అభిప్రాయాలు మార్చకుంటారు . కానీ ఒక్క దానికి ఎప్పుడూ స్టిక్ అవకూడదు. ఎస్కేప్కి ఓ మార్గం ఉంచుకుంటారు. కానీ పవన్ కల్యాణ్కు మాత్రం.. అలాంటి రాజకీయం వంట బట్టలేదు.
తాను సీరియస్ పొలిటీషియన్ను అని చెప్పుకోవడానికి పవన్ కల్యాణ్ .. ఇక సినిమాలు చేయబోనని ప్రకటించి ఉంటారని భావిస్తున్నారు. ఆయన సినిమాల్లో నటించకుండా పూర్తిగా రిటైర్మెంట్ తీసుకోవడం అసాధ్యమని.. చాలా మంది నమ్మకం. ఇప్పుడు అది నిజమవుతోంది. కానీ ఆయన చేసిన ప్రకటనల వల్ల ఇప్పుడు విమర్శలు ఎదుర్కోవాల్సి వస్తోంది. పవన్ కల్యాణ్ సినిమాల్లో నటించడానికి వ్యక్తిగత కారణాలు ఉండొచ్చు. రాజకీయ కారణాలు ఉండొచ్చు. అసలే కారణం ఉండకపోవచ్చు. కానీ ఆయన పని ఆయన చేసుకోవడాన్ని విమర్శించడం మాత్రం..విజ్ఞత అనిపించుకోదనేది చాలా మంది మాట.
