విజువల్ ఎఫెక్ట్స్కి ప్రాముఖ్యం ఉన్న కథ.. ‘విశ్వంభర’. ఇలాంటి సినిమాలకు పోస్ట్ ప్రొడక్షన్ చాలా కీలకం. అందుకోసం వీలైనంత ఎక్కువ సమయం తీసుకోవాలి. ఈ దిశగానే ‘విశ్వంభర’ టీమ్ వేగంగా అడుగులేస్తోంది. అందుకోసం టార్గెట్ కూడా ఫిక్స్ చేసుకొంది. జూన్ చివరి నాటికి షూటింగ్ మొత్తం పూర్తవ్వాలన్న లక్ష్యంతో చిత్రబృందం పని చేస్తోంది.
ఈనెల 20 నుంచి హైదరాబాద్ లో కీలకమైన షెడ్యూల్ ప్రారంభం కాబోతోంది. చిరంజీవి, త్రిషతో సహా మిగిలిన టీమ్ మొత్తం పాలు పంచుకోనుంది. ఈ షెడ్యూల్ లో పాటల్ని కూడా తెరకెక్కిస్తారు. చిన్న చిన్న బ్రేకులు మినహా.. జూన్ చివరి వారం వరకూ సుదీర్ఘంగా సాగే షెడ్యూల్ ఇది. దీంతో షూటింగ్ మొత్తం పూర్తవుతుంది. జులై నుంచి పోస్ట్ ప్రొడక్షన్ పనులు ప్రారంభం అవుతాయి. సీజీ ఈ సినిమాలో కీలక పాత్ర పోషించనుంది. అందుకోసం కొన్ని విదేశీ కంపెనీల్ని చిత్రబృందం సంప్రదించబోతోంది. నవంబరులోగా సీజీ పనులు కూడా పూర్తవుతాయని టాక్. సంక్రాంతి సందర్భంగా జనవరి 10 ఈ చిత్రాన్ని విడుదల చేయనున్నారు. కీరవాణి ఈ చిత్రానికి సంగీతాన్ని అందిస్తున్న సంగతి తెలిసిందే. ‘బింబిసార’ ఫేమ్ వశిష్ట దర్శకుడు.
