కోనసీమలో పవన్ కల్యాణ్ చేసిన దిష్టి వ్యాఖ్యలను తెలంగాణ లీడర్లు తమ పబ్లిసిటీ కోసం వాడుకుంటున్నారు. ఆ వ్యాఖ్యలు చేసి రోజులు గడిచిపోయిన తర్వాత ఇప్పుడు మీడియా అటెన్షన్ కోసం విమర్శలు చేస్తున్నారు. నాలుగు రోజుల తర్వాత తెలంగాణ కాంగ్రెస్ ఎమ్మెల్యే అనిరుధ్ రెడ్డి పవన్ క్షమాపణ చెప్పాలని డిమాండ్ చేశారు. ఆయన లాజిక్ మరీ విచిత్రంగా ఉంది. ఓజీ సినిమా ప్రీమియర్స్ కు రూ. 800 పెట్టి సినిమా చూసి నిర్మాతను గట్టెక్కించారట.. అందుకే పవన్ కల్యాణ్ అలా మాట్లాడకూడదని.. క్షమాపణ చెప్పాలని అంటున్నారు.
పవన్ పై విమర్శలు చేసిన వారికి మీడియా మంచి కవరేజీ ఇస్తుంది. అన్యాపదేశంగా చేసిన ఇలాంటి వ్యాఖ్యల్ని వివాదాస్పదం చేయడానికి చాలా మంది రెడీగా ఉంటారు. అలాంటి వారి కోసం ఇప్పుడు అనిరుథ్ రెడ్డి ఈ మాటలు మాట్లాడారు. పనిలో పనిగా రాజకీయాలను తీసుకు వచ్చారు. పవన్ కల్యాణ్ ఒంటరి పోటీ గురించి కామెంట్స్ చేశారు. ఇప్పటికే బీఆర్ఎస్ నేత జగదీష్ రెడ్డి పవన్ అంశంపై స్పందించారు. చాలా ఆలస్యంగా ఏదో గుర్తొచ్చినట్లుగా అనిరుథ్ రెడ్డి స్పందించారు.
పవన్ కల్యాణ్ అన్న మాటలను వివాదాస్పదం చేసి..సెంటిమెంట్ రాజేయాలని తెలంగాణలోని కొంత మంది నేతలు ప్రయత్నిస్తున్నారు. కానీ ఏపీపై గతంలో అలాంటి వారు మాట్లాడిన మాటల్ని.. జనసేన కార్యకర్తలు సోషల్ మీడియాలో వైరల్ చేస్తున్నారు. ప్రజల్ని రెచ్చగొట్టడానికి ఇష్టం వచ్చినట్లుగా ఆంధ్రా వాళ్లను తిట్టారని ఇప్పుడు.. పవన్ .. అన్యాపదేశంగా అన్న మాటను పట్టుకుని రాజకీయం చేస్తున్నారని విమర్శిస్తున్నారు.
