కర్ణాటకలో రాజకీయ సంక్షోభాన్ని ముగించి మంత్రివర్గానని పూర్తి స్థాయిలో పునర్ వ్యవస్థీకరించాలని కాంగ్రెస్ హైకమాండ్ భావిస్తోందని ప్రచారం జరుగుతోంది. అదే సమయంలో తెలంగాణలోనూ మొత్తం మంత్రి వర్గాన్ని మార్చేయాలని కసరత్తు ప్రారంభించినట్లు కాంగ్రెస్ వర్గాలు చెబుతున్నాయి. కొన్ని ఆశ్చర్యకరమైన సమీకరణాలను ముఖ్యమంత్రి రేవంత్ రెడ్డికి మద్దతుగా ఉండే మీడియానే ప్రచారంలోకి తెస్తోంది.

ఇందులో ఆసక్తికరమైన మార్పులు ఉన్నాయి. కోమటిరెడ్డి వెంకటరెడ్డిని పదవి నుంచి తప్పించి ఆయన సోదరుడు రాజగోపాల్ రెడ్డికి చోటివ్వడం, ఉత్తమ్ కుమార్ రెడ్డిని కూడా తప్పించి..ఆయన భార్య ..కోదాడ ఎమ్మెల్యే పద్మావతికి మంత్రి పదవి ఇచ్చే అవకాశాలు ఉన్నాయని ప్రచారం జరుగుతోంది. మంత్రి శ్రీధర్ బాబును పీసీసీ అధ్యక్షుడిని చేస్తారని అంటున్నారు. అదే సమయంలో మంత్రి జూపల్లికి ఉద్వాసన తప్పదని అంటున్నారు.

మొత్తంగా నలుగురు లేదా ఐదుగురు మంత్రుల్ని తప్పించే అవకాశం ఉందని… వివాదాల్లో ఇరుక్కున్న సీనియర్ మంత్రి పొన్నం స్థానంలో మహేశ్ కుమార్ గౌడ్ కు చోటు ఇస్తారన ిఅంటున్నారు. ఏఐసీసీ ప్రధాన కార్యదర్శిగా పొన్నంకు అవకాశం కల్పిస్తారని చెబుతున్నారు. శ్రీధర్ బాబును పీసీసీ చీఫ్ గా పంపకపోతే.. హోంమంత్రిగా కీలక బాధ్యతలు ఇస్తారని అంటున్నారు. ఈ మార్పు చేర్పులు నిజమైతే.. తెలంగాణ కాంగ్రెస్‌లో మరో సునామీ రావడం ఖాయమని అనుకోవచ్చు.