తెలంగాణ కాంగ్రెస్ పార్టీలో రోజురోజుకు జరుగుతున్న పరిణామాలపై పార్టీ అధిష్టానం సీరియస్ అవుతోంది. తెలంగాణలో కాంగ్రెస్ పార్టీ పరిస్థితి రోజురోజుకూ దిగజారుతోందనే సంకేతాలు అధిష్టానానికి చేరడంతో స్థానిక నాయకులపై అధిష్టానం ఆగ్రహం వ్యక్తం చేసినట్లు సమాచారం. తెలంగాణ కాంగ్రెస్ నాయకులు పార్టీని పటిష్ట పరచడంపై శ్రద్ధ చూపించకపోగా ఒకరిపై ఒకరు బహిరంగంగా విమర్శలు చేసుకోవడం పార్టీకి తలనొప్పులుగా మారిందని అధిష్టానం సీనియర్ నాయకుల వద్ద అన్నట్లు సమాచారం. “పార్టీ నియమించిన రాష్ట్ర ఇన్ చార్జిపైనే బహిరంగంగా విమర్శలు చేస్తే ఇక పార్టీపై ప్రజలకు విశ్వాసం ఎలా కలుగుతుందంటూ” సీనియర్ నాయకుడు గులాం నబీ అజాద్ తెలంగాణ నాయకుల వద్ద అన్నట్లు సమాచారం. తెలంగాణ పార్టీ వ్యవహారాల ఇన్ చార్జి ఖుంటియాను నియమించాలని అధిష్టానానికి సూచించింది తానేనని, ఆయనను బహిరంగంగా విమర్శించడమంటే తనను విమర్శించడమేనని గులాం నబీ అజాద్ తెలంగాణ నాయకుల వద్ద ప్రస్తావించినట్లు చెబుతున్నారు. పీసీసీ అధ్యక్షుడిగా ఎవరి నియమించాలనేది పార్టీ అధిష్టానం నిర్ణయిస్తుందని, ఇది దశాబ్దాలుగా వస్తున్న సంప్రదాయమని గుర్తు చేసినట్లు పార్టీ వర్గాలు చెబుతున్నాయి. కొత్త అధ్యక్షుడ్ని నియమించే వరకూ ప్రతి ఒక్కరూ ప్రస్తుత పీసీసీ అధ్యక్షుడి మాటే వినాలని, ఆయన ఆదేశాలకు అనుగుణంగా పని చేయాలని కూడా చెప్పినట్లు సమాచారం. అయితే, పార్టీ సీనియర్ నాయకుడు, ఎంపీ రేవంత్ రెడ్డి ప్రభుత్వాన్ని ఇరుకున పెట్టే కార్యక్రమం చేపడితే ఇతర నాయకులు మద్దతు తెలపాల్పింది పోయి విమర్శలు చేయడం ఏమిటని కాసింత ఘాటుగానే స్పందించినట్లు చెబుతున్నారు. ముఖ్యంగా జగ్గారెడ్డి, వీ. హనుమంతరావు వంటి సీనియర్ నాయకులు ప్రతి రోజూ రేవంత్ రెడ్డిపై చేస్తున్న విమర్శల కారణంగా కాంగ్రెస్ పార్టీ పరువు బజారున పడుతోందని వ్యాఖ్యానించినట్లు చెబుతున్నారు. తెలంగాణలో పార్టీ పరిస్థితిపై పార్టీ అధినాయకులు రాహుల్ గాంధీతో సహా సోనియా గాంధీ, అహ్మద్ పటేల్ ద్రష్టికి తీసుకువెళ్తానని కూడా గులాం నబీ అజాద్ తెలంగాణ నాయకుల వద్ద అన్నట్లు సమాచారం.