ఎన్నికల ఫలితాలు రాక ముందే.. తెలంగాణలో బేరసారాల ఆరోపణలు వెల్లువెత్తుతున్నాయి. ఉదయం నాగర్ కర్నూలు టీఆర్ఎస్ అభ్యర్థి, తాజా మాజీ ఎమ్మెల్యే మర్రి జనార్దన్ రెడ్డి.. తనను కాంగ్రెస్ లోకి రమ్మని… ఎంపీ కొండా విశ్వేశ్వర్ రెడ్డి ఆహ్వానించారంటూ సంచలన ఆరోపణలు చేశారు. మర్రి జనార్ధన్ రెడ్డి ఆరోపణలతో.. టీఆర్ఎస్ నేతలు.. కాంగ్రెస్ పై.. తీవ్రమైన విమర్శలతో దాడి ప్రారంభించారు. మర్రి జనార్ధన్ రెడ్డి తనకు.. కొండా విశ్వేశ్వర్ రెడ్డి వద్ద నుంచి వచ్చిన వాట్సాప్ కాల్ నెంబర్ ను మీడియాకు చూపించారు. ఎమ్మెల్యేలు తక్కువ అయితే.. మద్దతివ్వాలని కోరారని..జానారెడ్డి ఇంటికి వస్తే మాట్లాడుకుందామని ఆహ్వానించారని చెప్పుకొచ్చారు. కానీ తను తిరస్కరించానని .. నిప్పు లాంటి వాళ్లమని.. ఇంకెప్పుడూ కాల్ చేయవద్దని చెప్పానన్నారు. టీఆర్ఎస్ కు చెందిన మీడియా చానల్ “టీ న్యూస్ ” ఉదయం నుంచి ఇదొక్కదాని మీదే న్యూస్ రన్ చేస్తూ.. కాంగ్రెస్ నేతలతో పాటు.. చంద్రబాబుపైనా ఆరోపణలు గుప్పిస్తున్నారు.
దీంతో సాయంత్రానికి ఎంపీ కొండా విశ్వేశ్వర్ రెడ్డి మీడియా ముందుకు వచ్చారు. తాను అనేక మంది టీఆర్ఎస్ నేతలతో మాట్లాడుతూ ఉంటానని..ఫోన్ చేసినంత మాత్రాన ప్రలోభ పెట్టినట్లా అని ప్రశ్నించారు. తాను మాత్రమే మర్రి జనార్ధన్ రెడ్డికి ఫోన్ చేయలేదని..ఆయన కూడా అనేక సార్లు తనకు చేశారని… వాట్సాప్ కాల్ రికార్డ్స్ ను.. కొండా విశ్వేశ్వర్ రెడ్డి బయటపెట్టారు. 9000444777, 9030899999 ఈ నెంబర్స్ నుంచి మర్రి జనార్ధన్ రెడ్డి వాట్సాప్ కాల్స్ చేశారని బయటపెట్టారు. టీఆర్ఎస్ నేతల ఫోన్లన్నీ ట్యాపింగ్లో ఉన్నాయని.. అందుకే వారంతా టెన్షన్ పడుతున్నారని విమర్శించారు. తనపై అనవసరమైన ఆరోపణలు చేయడం సరికాదని మళ్లీ ఇలాంటి ఆరోపణలు చేస్తే పరువునష్టం దావా వేస్తానని హెచ్చరించారు. నాకు మర్రి జనార్థన్రెడ్డి ఒక్కడితోనే కాదు…50 మంది టీఆర్ఎస్ అభ్యర్థులతో మంచి సంబంధాలున్నాయన్నారు. టీఆర్ఎస్లో కొందరు మంచివాళ్లు కూడా ఉన్నారన్నారు విశ్వేశ్వర్రెడ్డి.
ఎన్నికల ఫలితాలు రాక ముందే.. కాంగ్రెస్, టీఆర్ఎస్ మధ్య.. ప్రలోభాల ఆరోపణలు వెల్లువెత్తడం రాజకీయ వర్గాలను కూడా ఆశ్చర్య పరిచింది. రేపు పొరపాటున తెలంగాణలో హంగ్ అసెంబ్లీ వస్తే.. ఇక ఇలాంటి ఆరోపణలకు హద్దే ఉండదన్న అంచనాలు వెలువడుతున్నాయి.
