జబర్దస్త్ గ్యాంగ్లో ధన్రాజ్ ఒకడు. ఆ షో పుణ్యమా అని తాను కూడా పాపులర్ అయ్యాడు. ఇంకాస్త పాపులర్ అవుదామన్న ఉద్దేశం కలిగిందేమో.. పనిలేని పులిరాజు అంటూ ఓ సినిమా మొదలెట్టాడు. అది పూర్తయ్యింది.. విడుదలకూ రెడీగా ఉంది. ధన్రాజ్, రఘుబాబులు తప్ప తెలిసిన మొహాలేం కనిపించడం లేదు. కాకపోతే.. టైటిల్ కాస్త ఆకర్షణీయంగా కనిపిస్తోంది. దానికి తోడు ధన్రాజ్ అంటే కామెడీ ఆశిస్తారు. ఈ సినిమా ట్రైలర్ చూస్తే… కామెడీ కంటే బూతు గోల ఎక్కువగా ఉన్నట్టు కనిపిస్తోంది.
ధన్రాజ్ ఓసారి మసాజ్ సెంటర్కి వెళ్లి.. అక్కడ అడ్డంగా దొరికిపోయాడు. ఇప్పుడు ఆ ఎపిసోడ్ని కూడా ఈ సినిమాలో గుర్తు చేశాడు. ‘అన్ని మసాజ్ సెంటర్లూ ఒకేలా ఉండవు’ అన్న డైలాగ్ కొట్టించి.. మసాజ్ మసాజ్ అంటూ ఓ ఐటెమ్ పాట వేసుకొన్నాడు. మర్చిపోయిన సంగతికి కోరి కెలుక్కోవడం ఎందుకో మరి. పుల్లకే పిల్లలు పుట్టేస్తారా..? నువ్వు ఫ్రెష్ కాదా.. ఇలాంటి అడల్ట్ డైలాగులు ఈ టీజర్లో వినిపిస్తున్నాయి. మరి సినిమాలో ఆ కంటెంట్ ఎంత వరకూ ఉంటుందో..! దానికి తోడు ధన్రాజ్ డాన్సులు చేసి..నిజం హీరోల బిల్డప్పు ఇస్తున్నాడు. ఇవన్నీ ఎంత వరకూ వర్కవుట్ అవుతాయో చూడాలి మరి.
