ప్రధానమంత్రి నరేంద్రమోడీ హైదరాబాద్ వస్తున్నారు. ఆయన ప్రధాని హోదాలో వస్తున్నారు…వస్తోంది కూడా రాజకీయ పర్యటనకు కాదు. కాబట్టి.. ఓ ప్రోటోకాల్ ఉంటుంది. దాని ప్రకారం.. ముఖ్యమంత్రి ఎదురెళ్లి స్వాగతం చెప్పాలి. మామూలుగా అయితే.. ఇది పెద్ద వివాదం కాదు. ఏ ముఖ్యమంత్రి అయినా వెళ్లి స్వాగతం పలుకుతారు. అధికారిక కార్యక్రమాలకు వచ్చారని..మోడీని తీవ్రంగా వ్యతిరేకించే మమతా బెనర్జీ లాంటి నేతలు కూడా వెళ్లి స్వాగతం పలికి సందర్భాలు ఉన్నాయి. కానీ కేసీఆర్ మాత్రం వెళ్లడం లేదు. మోడీ పర్యటన ఖరారయినప్పటి నుండి అదే పనిగా ఈ అంశంపై చర్చ జరుగుతోంది. మోడీకి స్వాగతం పలకడానికి కేసీఆర్ వెళ్తారా లేదా అన్నదానిపైనే చర్చ.
శుక్రవారం సాయంత్రం వరకూ అదే తరహా చర్చ జరిగింది. వెళ్తారా.. లేదా అన్నదానిపై… సీఎంవో కూడా స్పష్టత ఇవ్వలేదు. చివరికి పొద్దు పోయిన తర్వాత ప్రధానమంత్రి మోదీనే స్వాగతానికి వద్దన్నారనే సమాచారాన్ని మీడియాకు అందించారు. ప్రధాని మోడీ వ్యక్తిగత కార్యదర్శి స్వయంగా సీఎస్కు ఫోన్ చేశారని.. ఎలా స్వాగతం చెప్పాలో.. ఎవరెవరికి అనుమతి ఉందో చెప్పారని అంటున్నారు. మొత్తంగా ఐదుగురు అధికారులకు మాత్రమే మోడీకి స్వాగతం చెప్పడానికి పర్మిషన్ లభించింది. గవర్నర్ కూడా వెళ్లడం లేదు. పీఎంవో చెప్పిన ఈ ఫార్మాలా బాగుండటంతో.. కాగల కార్యం పీఎంవోనే తీర్చిందని.. టీఆర్ఎస్ వర్గాలు సంతోషపడ్డాయి.
అయితే.. తెలంగాణ పర్యటనకు వచ్చినా.. ముఖ్యమంత్రి కేసీఆర్ ఉద్దేశపూర్వకంగా ఆహ్వానికి రాకపోతే.. ఇబ్బందికర పరిస్థితులు వస్తాయన్న ఉద్దేశంతోనే పీఎంవో… ఈ తరహా నిర్ణయం తీసుకున్నట్లుగా భావిస్తున్నారు. గతంలో కేసీఆర్తో మోడీకి సన్నిహిత సంబంధాలు ఉన్నాయి. ఇప్పుడు మారిపోయిన రాజకీయం కారణంగా కేసీఆర్ .. కేంద్రంపై యుద్ధం చేస్తానని చెబుతున్నారు. బీజేపీని బద్మాష్ బీజేపీ అంటున్నారు. ఈ కారణంగా గ్యాప్ పెరిగిపోయింది.
