ఈ యేడాది టాలీవుడ్ లో భారీ, క్రేజీ చిత్రాలు ప్రారంభం కాబోతున్నాయి. వాటిలో మహేష్ – రాజమౌళి, ఎన్టీఆర్ – ప్రశాంత్ నీల్ చిత్రాలు ముందు వరుసలో ఉన్నాయి. ‘గుంటూరు కారం’ పూర్తయిన వెంటనే రాజమౌళి సినిమా పట్టాలెక్కుతుందని భావించారు. అయితే స్క్రిప్టు పనులు, ఇతర నటీనటుల ఎంపికలో జాప్యం వల్ల ఆలస్యం అవుతోంది. ఈ సినిమా సెట్స్ పైకి ఎప్పుడు వెళ్తుందన్న విషయంలో నిర్మాత కె.ఎల్.నారాయణ ఓ క్లారిటీ ఇచ్చేశారు. సెప్టెంబరు లేదా అక్టోబరులో చిత్రీకరణ మొదలవుతుందని ప్రకటించారు. ఈలోగా ప్రీ ప్రొడక్షన్ పనులన్నీ చక్కబెడతారు. ఈ సినిమా కోసమే హైదరాబాద్ లో కొన్ని కీలకమైన సెట్స్ తీర్చిదిద్దుతున్నారు. మహేష్ కూడా పాత్రకు తగ్గట్టుగా తన రూపు రేఖల్ని మార్చుకోవడానికి కొంత సమయం అడిగాడని టాక్. దాంతో… మహేష్ సినిమా కాస్త ఆలస్యంగా సెట్స్పైకి వెళ్తోంది.
మరోవైపు ఎన్టీఆర్ – ప్రశాంత్ నీల్ పరిస్థితి కూడా ఇంతే. ఈపాటికే ఈ కాంబోలో సినిమా పట్టాలెక్కాల్సివుంది. అయితే ‘వార్ 2’ రూపంలో ఎన్టీఆర్ కు ఓ అనూహ్యమైన అవకాశం రావడంతో తన డేట్లన్నీ ఆ సినిమాకి కేటాయించాల్సివచ్చింది. అక్టోబరు నాటికి ‘వార్ 2’ షూటింగ్ పూర్తవుతుందని, ఆ వెంటనే ప్రశాంత్ నీల్ సినిమా పట్టాలెక్కుతుందని తెలుస్తోంది. ఈలోగా ప్రశాంత్ నీల్ ‘సలార్ 2’ షూటింగ్ మొదలెడతారా, లేదా? అనేది వేచి చూడాలి. ప్రశాంత్ దృష్టి ఇప్పుడు ఎన్టీఆర్ ప్రాజెక్ట్ పై ఉందని, ఆ కథపైనే కసరత్తులు చేస్తున్నారన్నది ఇన్ సైడ్ వర్గాల టాక్.
