మరికొద్ది గంటల్లో కొండపొలం ప్రేక్షకుల ముందుకు రానుంది. క్రిష్ దర్శకత్వం వహించిన ఈ చిత్రంలో వైష్ణవ్ తేజ్ కథానాయకుడు. ఓ నవల ఆధారంగా రూపొందిన చిత్రమిది. ప్రచార చిత్రాలు ఆకట్టుకున్నాయి. సినిమాపై అంచనాలు ఏర్పరిచాయి. ఇప్పుడు ఈ సినిమాకి సంబంధించి తొలి రివ్యూ వచ్చేసింది. అదీ చిరంజీవి నుంచి.
కొండపొలం చిత్రాన్ని చిరంజీవి కోసం హైదరాబాద్ ప్రసాద్ లాబ్స్ లో ప్రత్యేకంగా ప్రదర్శించారు. ఈ సినిమా చూసిన వెంటనే చిరు తన ఆనందాన్ని వ్యక్తం చేశారు. “ఇప్పుడే కొండపొలం చూశాను. గ్రామీణ వాతావరణాన్ని అందంగా ప్రతిబింబిస్తూ, చక్కటి సందేశం ఇచ్చారు.క్రిష్ ప్రతీసారీ వైవిధ్యభరితమైన కథల్ని ఎంచుకోవడం, నటీనటుల నుంచి అద్భుతమైన ప్రదర్శన రాబట్టుకోవడం చూస్తుంటే ఆనందం కలుగుతోంది. ఈ సినిమా విమర్శకుల ప్రశంసల్ని, అవార్డుల్ని, రివార్డులనీ అందుకుంటుందన్న నమ్మకం ఉంద“ని చిరు ట్వీట్ చేశారు. ఈ సినిమా విడుదలకు ముందే చిరు నుంచి ఈ రకమైన ట్వీట్ రావడం చిత్రబృందానికి బూస్ట్ లాంటిది.
